Дагъусттаннал Минздраврал машан лавсун бур цIусса журалул 100 000 тест коронавирусрал инфекция ялун личин дайсса. Цалчинсса 5000 тест бувкIун бушиву баян бунни лахьхьу Дагъусттаннал цIуллу-сагъшиву дуруччаврил министр Татьяна Беляевал.
– Республикалул БакIчи Сергей Меликовлул амрулийн бувну, ДР-лул ЦIуллу-сагъшиву дуруччаврил министерствалул республикалул бюджетравасса арцух машан лавсунни коронавирус ххал дансса ПЦР экспресс-тестру. ЧIал къавхьуну бучIантIиссар 100 000 тест. ХIакьину жучIан бувкIунни цалчинсса 5000 тест. Агьали ххал булланшиврул дузал дурну дуссар анаварсса ва къулайсса шартIру, – увкунни министрнал.
Ванил бусаврийн бувну, цIусса системалул кумаграйхчин, 10-15 минутрал дянив аьщуйн щуну кIул дан бюхъан тIий бур коронавирус дуссарив, дакъассарив майравасса ва кьацIливасса хьюмушиву ларсун.
– ЦIусса ПЦР экспресс-тестру биян бантIиссар республикалул ковид-стационардайн ва поликлиникарттайн. ХьхьичIва-хьхьичI ми ишла буллантIиссар COVID-19 азарданул къашавай хьуминнащал хIала-гьурттуну бивкIсса инсантал ххал бан. Мунийну бюхъан тIий бур, коронавирусрал инфекция ду-дакъашиву анаварну ялун личин дурну, ми анаварсса бущилий хъин буллай байбишин. Мунийну бюхъантIиссар COVID-19 анаварну ппив хъанахъаву дайщун дан, – ххи бунни Беляевал.
Оператив штабрал сияхIрайн бувну, ноябрь зурул 2-нний Дагъусттаннай ялун ливчуну бур коронавирусрал инфекция лархъсса 164 иш.
ХIакьинусса кьининийн къашавай хьуминнал аьдад лархъун дур 56 336-ннийн.
