ЦIуссалакрал райондалий вай махъсса гьантрай чялиш бувккун дуллан бивкIунни пирививкар­тту. Дагъусттаннайгу, щала билаятрай кунна, баян бунни коронавирусрая мюхчан баву мурадрайсса тIалавшиннарду. КоронавирусрацIун дархIусса эпидемиологиялул тагьар хIи­савравун ларсун школарттай, садикирттай ва цаппара цаймигу идарарттай баян бунни къазузи кьинирду.

ЦIуссалакрал райондалий бигьалагай кьинирдайгу зий буссар коронавирусрая буруччаву мурадрайсса вакцинартту буллалисса кIивагу пункт. Райондалий ялу-ялун чIяву хъанай бур вакцинартту буллалими. Му хъиннува исват хьунни коронавирусрал инфекциялия буруччаву мурадрай къадагъа дирхьусса гьантрай. Ваниннин хьхьичI райондалий кьинилун 30-60 инсан буллай ивкIхьурча вакцинартту, октябрь зурул 30-нний бувну бур 200-нния ливчусса инсантурал. Вай гьантрай дурсса хIасиллайн бувну, ЦIуссалакрал райондалий вакцинартту бувну бур 731 инсаннал. Коронавирус лахъанссар тIисса нигьачIаву дакъа ялапар хъананшиврул уттигу 21 882 инсаннал бан багьлай бур вакцинартту. Аьмну райондалий вакцинартту бувну бур 10 326 инсаннал .
Уттинин райондалийн був­кIун бур 14 600 доза вакцинар­ттал: «Гам-КОВИД», «Эпи-ВакКорона» ва «Спутник Лайт». Мас­лихIат буллай бур хьхьичIава къашавай хьуну бивкIсса ягу прививка дурну чIун ларгсса инсантуран «Спутник Лайт» вакцинартту бансса. Райондалул кIивагу поликлиникалий дуссар ялув к1ицI лавгсса вакцинарттал луртан. ХIакьинусса кьини исват хъанай бур Аьрасатнал вакцинартту заралсса бакъашиву. Мунийн бувну, маслихIат буллай бур 22 нюжмардува ливчу­сса лякьлуву оьрчI бусса хъаннингу вакцинартту баву. Мукунма, вакцинартту бан маслихIат буллай бур 60 шинава ливчусса оьрмулул инсантуран. Цанчирчан, ялув кIицI лавгсса инсантал багьлай бур нигьачIаву ду­сса категориялувун.
Оьвчаву дуллай бур агьалинайн, баян бувсса бигьалагай кьинирдай аьркиншиву дакъа чIявусса инсантал бу­сса кIанттурдайн къабуккаву, цалагу, цалва кулпатиртталгу цIуллу-сагъшиву дуруччаврил ялув бацIан. Ттучаннайн ва цаймигу иширттай нанийни лаххияра маскарду, бюхъайссаксса кувнная кув ятну бикIияра.