Апанни Къапиев – оьрус мазрайсса литературалул рувхIанийсса ирс-ххазинар

Апанни Къапиев – оьрус мазрайсса литературалул рувхIанийсса ирс-ххазинар

Ккавкказуллал чичултрал творчество дунияллул литературалул гъунттуйн дуккан дуваву мурадрай тамансса давуртту дюрхъуну дуллалисса шаэр, публицист, критик, Аьрасатнал Чичултрал союзрал Дагъусттанналмур отделениялул хъунмур ва Ккав­кказуллал чичултрал къатлул вице-президент Миясат Муслимовал сипталийну ва хIарачатрайну Дагъусттаннай дунни ххуйсса даву. Дурунни Къапиевлул цIанийсса таржумачитурал конкурс «Резьба по камню». Шиккува кIицI лаган, ва конкурсращал архIал, вава Миясат Муслимовал хIарачатрайну, хьунни цамургу конкурс: СалихI Гуртуевлул цIанийсса Аьрасатнал поэзиялул конкурс «Есть родина – а значит, счастье есть».

Конкурсирттай гьурттушинна дунни цайми регионнаясса ва хIатта кьатIаллил билаятирттаясса шаэртурал ва таржумачитурал.
Аьралий журналист, шаэр, чичу, таржумачи Апанни Къапиев щалвагу Аьрасатнал оьрус мазрай­сса литературалул рувхIанийсса ирс-ххазинар. Ва батIлай ва цачIун буллай ивкIссар литературалул гужру. Дагъусттаннал Чичултрал союзрал хъунама МахIаммад АхIмадовлул увкусса куццуй: «Апанни Къапиев къаивкIссания, Дагъусттаннал литературалуву чIярусса цIарду къадикIантIиссия». Гьамин, Апанни Къапиевлул конкурс барачат хьунур лакрал чичултралми произведенияртту оьрус мазрайн таржума бувансса хIалу дагьссагу. КIицI лаганну конкурсрай хьхьичIунсса кIану бувгьушиву лакрал чичултрал, Ссугъури Увайсовлул ва Алексей ХIажиевлул, назмурду ­оьрус мазрайн дурцусса таржумачи, Къазаннаясса Галина Булатовал.
Конкурс лавайсса даражалий гьаншиврул кабакьу бунни Мариян Илиясовал цIанийсса «Дараччи» фондралгу, дакI цIуцIаву дусса лакрал интеллигенциялул вакилтуралгу. «ТIайламур бусан, ттул ттулвагу хиял буссия Апанни Къапиевлул цIаницIун дархIусса, ванал цIанил кьимат бюхттулну бушиву ккаккан бувансса даву дуван. Миясат Муслимовал мукун­сса даву дуллали­сса хавар шайхту, барчаллагьрай хIала бувхру жугу. ДакIнийхтуну барчаллагьрай буру проектран кумаг був­сса вакилтурайн: Марат ва Марис Илиясовхъайн, Зиябуттин ХIажимирзаевлуйн. Барчаллагьри чIарав бавцIусса «Дараччилул» душваврангу: Качар ХIусайнаеван, Жанна Абуеван, Асият Буттаеван, Аьжа АьбдурахIманован, Тарият Къапиеван, Сарижат Ттаттаеван. Мукунма конкурсраву ххув хьуминнайн ва жюрилуйн хъамалу оьвкусса «Инт» кафелул хъунмур Саидат Кьурбановайн, хъамаллуран Дарбант шагьру ккаккан бувсса гид Тамара Закарьяевайн. ЛичIинува барчаллагьрай буру «Дараччилул» даврин кьимат бивщусса Дагъусттаннал культуралул министр Зарема Буттаевайнгу», — т1ий бур «Дараччи» фондрал хъунмур Гульшан Хасаева.
Ххи буванна, Аьрасатнал халкьуннал культура, литература гьаз дуван Миясат Муслимовал буллали­сса хIарачат архIала халкьуннал дянивсса дусшиву цIакь даву мурадрайссагу хъанахъишиву. Ва ялагу, гьарцагу миллатрал литература щалвагу Аьрасатнал ва дунияллул литературалул хъус хъанай духьувкун, ххуйрихха лакралгу, къалакралгу литературалия Аьрасатнал агьулданун хавар бунугу.

Аватар

Патимат Рамазанова

Заслуженный работник культуры РД

Читайте также: