«Кинокавказ» – жагьилтурал фестиваль

Ноябрьданул 24-ннин кьамул буллалиссар «Кинокавказ» тIисса жагьилтурал фестивальданийнсса аьрзри. Ваний гьуртту хьун оьвтIий бур дагъусттанлувтурайнгу.

Фестиваль хьунтIиссар Нальчикрай, Ухссавнил Ккавкказуллал паччахIлугърал искусствалул институтраву, цIанасса тагьаргу хIисавравун ларсун, онлайн кьаралданий, манзилданий.
Кинофестивальданул пресс-къуллугърал бувсъсса куццуй, ваний гьуртту хьуну, жюрилул хьхьичIун цалла ларсъсса личIи-личIисса (короткометражный, анимационный, документальный фильмру, социал роликру) фильмру дуккан дуван бюхълай бур оьр­мулул 16 шинава 35 шинавун бияннинсса жагьилсса режиссертураща.
Фестивальданийн гьан дурсса давурттан кьиматру бишлантIиссар вай номинациярттай: «лучший короткометражный игровой фильм», «лучший короткометражный анимационный фильм», «лучший телевизионный документальный фильм», «лучший социальный видеоролик».
Жюрилул председательну ур ВГИК-рал кинорал режиссуралул ва телевидениялул курсрал каялувчи, доцент, пишакарсса кIулшиву ласаврил федерал эксперт Виталий Калинин.