Каспийскалий дакIнийн бивчунни терактраву ливтIуми

Каспийскалий дакIнийн бивчунни терактраву ливтIуми

Вай гьантрай Каспийскалий хьунни 1996-ку шинал терактраву ливтIуми дакIнийн бичлачисса дягъулул митинг.

Жунна дакIнийссар ванияр 25 шинал хьхьичI Каспийскалий, пограничниктурал къатри пIякь учин дурну, 69 инсан, миннавух мюрщисса оьрчIругу, ливтIусса та лухIи кьини.
Ва балаллуву оьрмулуцIа хьуми дакI­нийн бичин бувкIун бия ДР-лул ХIукуматрал председательнал хъиривчунал кIанайсса Рамазан ЖахIпаров, Дагъусттаннал ФСБ-лул хъунама Анд­рей Корпенко, Дагъусттаннал прокурор Алексей Ежов, Каспийскаллал бакIчи Борис Гонцов, Дагъусттаннал МЧС-рал Агьаммур управлениялул хъунама Нариман КазимахIаммадов, министерствар­ттал ва ведомстварттал вакилтал. Дягъулул митинграй гьуртту хьун мукунма бувкIун бия ДР-лул ФСБ-лул зузалт, волонтертал, шагьрулул школардал дуклаки оьрчIру, Каспийскаллал хьхьирил школа-интернатрал кадетътал.
Официальнайсса бутIа байбишиннин цинявннан ккаккан дунни «Направленный взрыв» тIисса, балаллуву ливтIуминнал гъан-маччанал дакIнийн бичавуртту, бардултращалсса интервьюрдавасса парчри ккаккан буллали­сса фильм.
«Каспий-медиа» изданиялул сурат ласайсса группалущалсса ихтилатраву бала ккавкми ва ливтIунал гъан-маччами дакIнийн дутлай бия та кьини. «Ва кьини дунияллия лавгунни жул нину ва ппу. Жу 9-мур зивулия багьну бияв, амма сагъну ливчIун буру. На шанна ссят ва дачIиннуй лекьрурдал лув ливчIун бияв. Ттун цIунил занан лахьлан багьуна. Хъинну захIматсса тагьарданий буссияв. Ссин, Оксанан, няран ва ччаруллан зарал хьуну бия. Оьрмулул 13 ва 8 шинаву жу ятинтал хьунав. Жу ччаннай бацIан бунну ниттил ниттил. Ганин цIана 86 шин дур. ЦIана жул жула кIи-кIия оьрчI бур. КIинналагу ларайсса кIулшивуртту ласарду, аьралитал хьуру. Нитти-буттал аьпа ябуллай, къуллугъ буллай буру», – буслай бур Кристина Колоскова.
Митинграй кIицI дурна лекьрулулу ливчIсса цинявннал цIарду. Миннал аьпа­лун минутIрайсса пахъ багьаву баян бувна. Хъирив кьюкьа дархIуну, митинграл гьурттучитурал тIутIив дирхьунни аьпалул хьусса пограничниктуран ва миннал кулпатирттан дацIан дурсса гьайкалдануцI.

Аватар

Андриана Абдуллаева

Андриана Абдуллаева

Читайте также: