Мюхтажминнайх ччатI бачIу
Бельгиянал хъуншагьру Брюсселлай яхъанахъисса марокканец АхIмад бин АьбдурахIманнул гьар кьини, хьхьувай пекарнярдайх увккун, ччатI машан ласайсса бур, яла ччатI биян байсса бур ахIвал кIюласса ужагъирттайн. Ва шагьрулул дязаннивсса ца патирданул каялувчи ур, 27 шинай каялувшиву дуллай ур цувагу. Шагьрулул агьулданун ва ххуйну кIулну ур дакI-аьмал хъинсса ва хъинбалдарал давуртту дуллалисса инсан хIисаврай. АхIмадлунгу кIулну бур цуми кулпатирттан ци кумаг аьркинссарив. Ванал хъунмур мурадрив цучIав ккашилну уттуишин къаитаву бур, ччатI бачIу шагьрулул агьулданун хъинну бусравну усса ур.
вакцинарду къабувми уква къахъин буллан тIий бур
Сингапурдай уква къахъин буллан тIий бур прививкартту къадурсса ковидрал къашайшалт. Уква хъин буллан тIий бур прививкартту дуван къадагъа дусса 12 шинавун бияннинсса оьрчIру ва личIи-личIисса азардайн бувну прививка дуван къабучIими. ЦIусса низам цIакь дуван тIий бур декабрь зурул 8-нний.
Лидия Руслановал цIусса альбом
Совет балайчи, РСФСР-данул лайкь хьусса артистка Лидия Руслановал ( Прасковья Лейкина-Горшенина) балайрдал цIусса альбом итабавкьунни аьрасатнал музыкантътурал. Ванил репертуардануву чIявуми оьруснал халкьуннал балайрду бур. Ва хаснува машгьур хьуну бур балайчи хIисаврай Хъунмасса Буттал кIанттул цIанийсса дяъвилул шиннардий. Ванил чIуниву ниттил, ссил, душнил, аьзизмунил чIу чIюхлан бикIай тIий бивкIун бур тай бала-мусиватсса шиннардий. Альбом итабавкьуну бур ванин 120 шин шаврин хасну.
Яла багьлул ххирамур машина
Британиянал «Роллс-Ройс» компаниялул дунияллий яла ххирамур машиналун ккаллисса Воат Таил автомобиль итабавкьуну бур. Бувагу шанма машина. Ца машиналул багьа бусса бур 28 миллион доллардал. Шанмагу кабриолетрал лахъишиву дур 530 сантиметра ва сайки щалва машина уникальныйсса деталлая каних бавтIун бур. Каних ранг бувну бур. Ва моделдануха Британнал агьлу мукьра шинай зий бивкIун бур.
