МухIаммад Идавсил (с.аь.с) хIурматран Мадиналий бачIва ччаннах
Уттигъанну Мадиналивсса МухIаммад Идавсил (с.аь.с) мизитравун биян бувкIун бур Пакистанная делегация. Премьер-министр Имран- Хан ва ванал щарсса самолетрал чурттуйх бачIва ччаннах бувчIун бур Идавсил (с.аь.с) хIурматран. Вай бачIва ччаннах Мадиналул аьрщарайх нанисса суратру щаллагу дунияллийх ппив хьуну дур. Шиккува кIицI лаган, бачIва ччаннах Пакистаннал делегация Мадиналив заназаву цIакь хъанахъисса аьдат дур. 2021-ку шинал май зуруйгу Пакистаннал делегация, вава Имран-Хан бакIчисса, укунма бачIва ччаннах бувчIун бур самолётрал чурттуйх.
Ца пассажиркал цIаний зузисса станция
Япониянаву шанна шинал мутталий так ца пассажиркал цIаний зий бивкIун бур станция Хоккайдо жазиралий, Ками-Ширатаки тIисса вокзалданий. КIийла бияйсса бивкIун бур поезд тиккун: душ школалийн буцингу, биян бувангу. 2013-ку шинал Япониянал муххал ххуллул управленияллул хIукму бувну бур станция лакьин. Пассажиртал чанну бивкIун бур. Управлениялул хъуниминнан хавар хьуну бур Ками-Ширатакалийн школалийн нанисса ца душ бучIайшиву. Му душнилшиврий къалакьинсса хIукму буваврицIун, гьар шинах ремонт байсса бивкIун бур. Ххишалдаран, перронгу марххалттануцIа марцI байсса бивкIун бур. Поездрал расписаниягу душнил дарсирдал расписаниялуцIун цIакь дурну дур. Душнил школа къуртал бувайхту лавкьуну бур станция.
Ниттил маз язи бугьансса ихтияр дуссар
Чувашиянал бакIчи Олег Николаевлул цала Telegram-каналданий бувсунни цачIанма чIявусса нину-ппу аьрзирдай букIлай бушиву, школардай учительтал оьрчIру ниттил маз хIисаврай оьрус маз язи бугьан буллай бушиврия рязи бакъа. Региондалул хъунама ур учительтурал «Об образовании» федерал закон зия дуллалиссар, Чувашиянаву оьруснал ва чувашнал мазурдих цакуццуйсса къулагъас дикIан аьркинссар, школардайгу мазру цакуцну ккаклан аьркинссар тIий. Ванал махъ буллунни закон зия дуллалисса учительтал танмихIрайн кIункIу буллан, иш миккун биярча.
Ссибирнал ва Арктикалул агьулданунсса ппив бай-батIай къатри
Ссибирнал федерал университетрал зузалтрал Ссибирнал ва Арктикалул агьулданунсса , ппив байсса-батIайсса тахта-тIаннул къатри хIасул бувну бур: дякъил 50 градусру, кIиришиврул 40 градусру духIайсса. Ккаккан ми къатри цинявннуя личIи бакъасса бур. Жура-журасса мурхьирдал тIаннул цIусса технология ишла дурну, цIакьсса ва эмаратсса къатри буллан тIий бур. Агьалинан ми ххуй бизларча, чIявусса къатри буллан тIий бур. Ми къатрал ца квадратрал метргу укуннасса къатралминнуяр 20 процентрал кьюркьуну дацIан тIий дур. Машинарттай къатри ччинийн биян буван хьунтIий бур. БавтIуну къатта, бацIан бувангу ца нюжмар гьа хъанай дур. Гьаннайсса, ца нюжмардул дянив къатри буван тIий бур.
