Дагъусттаннаясса ва Ухссавнил Ккавкказнал ваймигу республикарттаясса инсантураща утти декабрь зуруй чIивимур хIаж буван гьан хьун тIий бур. Пандемия баян бувния мукьах утти­нин къалавгссия хIажлийн.

ХIажлийн гьан хьун тIийгу бур МахIачкъалалия тIайланна Джиддалийн лехлахисса самолётрай. ХIажлилсса буллалисса «Марва-тур» компаниялул гендиректор Булат Кьурбановлул баян бувсса куццуй, декабрь зурул 15-нний АхIмад-Хан Султаннул цIанийсса МахIачкъалаллал аэропортрая Аьрабусттаннайн лехлан тIий дур самолётру. Саоьдуллал Аьра­бусттаннал 2020-ку шинал февраль зуруй шинал лажиндарай буван бучIисса чIивимур хIаж баву дацIан дурна. Июнь зуруй мукунма кьатIаллил билаятирттая хIажлийн къабитлансса хIукму бувссия. 2021-ку шинал августрал 1-нния шинмай кьатIаллил билаятирттая кьамул буллай байбивхьуссар Аьрабусттаннал ЦIуллушиву дуруччаврил министерствалул тIалавшиннарайн бувсса вакцина бувми, так Аьра­сатнал вакцинарду цалсса му сияхIрай бакъар. Кьурбановлул бувсмунийн бувну, Джиддалийн рейсру дикIан тIий дур цал­сса кIира нюжмардий цал. Агар Аьра­бусттаннал властирдал Аьрасатнал вакцинарду бувми кьамул булларча, рейс гьар нюжмардий дикIан тIий дур. Аьрасатнал Бусурманнал рувхIаний управлениялул хъуниминнал Аьрабус­ттаннал хъуниминнайн чагъарду гьан бувну бур августрайва Аьра­сатнал вакцина «Спутник» бувминнангу хIаж бувансса ххуллу булара тIий.