Ноябрьданул 8-сса кьини Аьрасатнаву кIицI дувайссар Къуллугърал бурж бартбигьлай жанну дуллусса виваллил иширттал органнал зузалт дакIнийн бичлачисса кьини.

Дагъусттаннал халкьуннан ва щиннияргу асар хъана­хъисса кьини дур. ЧIявусса Да­гъусттаннал полициялул зузалт оьрмурдацIа хьунни, хаснува 90-ку шиннардия байбивхьуну, цала къуллугърал буржру биттур буллай.
Гьарица шинах МВД-лул цинярдагу подразделениярттаву шай вай дакIнийн бичлачисса мероприятияртту.
Дагъусттаннал Виваллил иширттал министерствалул хьхьичIсса майданнив ва кьини хьунни «Память Сердца» акция. Шикку гьуртту хьунни Дагъус­ттаннал БакIчи Сергей Меликов, ихтиярду дуруччай структурардал, министерстварттал ва ведомстварттал каялувчитал. Майданнив бавтIсса, ччяни дунияллия лавгсса буттахъал, ттаттахъал суратру дургьусса оьрчIайн ящувкун, дакI къумалаглай дия, 150-ннийн бивсса оьрчIру бия ва кьини ппухълу дакIнийн бичин бувкIун. Республикалул БакIчи, виваллил иширттал министр ва циняв къуллугъчитал, виваллил органнал зузалт, оьрчIру, аьпалухьхьун лавгминнал кулпатру кьюкьа дурну майданнияту Лениннул цIанийсса Комсомолданул паркравун бувкIун, дирхьунни тIутIив Абадул цIарачIа.
Махъунмай зана хьуну, мукунна тIутIив дирхьунни МВД-лул хьхьичIсса къуллугърал бурж бартбигьлай жанну дуллу­сса зузалтрансса гьайкалдануцI. Баян бунни минутIрайсса пахъ багьаву. Аьдатравун багьсса куццуй, полициялул зузалтрал, аьпалул чирахъру бивхьуну, «ДакIний буссару, ххирассару» тIисса махъру чивчунни.
1994-ку шиная хIакьинусса кьининин къачагътурал канища ливтIуну ур Дагъусттаннал виваллил иширттал 762 зузала, 16 зузалан дуллуну дур Аьрасатнал Виричунал цIа, 13-ннан — аьпалул хьуну махъ.