Ноябрь зурул 10-нний Дагъусттаннал Виваллил иширттал министерствалул къатрал хьхьичI хьунни Виваллил иширттал органнал зузалал кьинилун хас дурсса шадлугърал мероприятие.
Ва байрандалул тарих байбихьлай бур 1718-ку шинал, Петр 1 паччахIнал хIукмулийну жяматийсса низам дуруччайсса цалчинсса къуллугъ сакин бувсса чIумал. Ва къуллугърайнгу полиция тIий бивкIун бур. Мунияр махъ тамансса дахханашивртту хьуну дур. 1917-ку шинал ноябрьданул 10-нний рабочая милиция бансса хIукму бувну бур. Байран хIисаврай ва кьини цIакь дурну дур 1962-ку шинал. Щалагу билаятрай официальнайну байран кIицI дуллан бивкIссар 1980-ку шинал. 2011-ку шинал октябрь зурул 13-нния байбивхьуну ванийн Виваллил иширттал органнал зузалтрал кьини тIун бивкIссар.
Гьар мудан кунма, хIакьинусса кьинигу, оперативниктал, участковыйтал, ДПС-лул зузалт ва цаймигу подразделенияртту дуручлай буссар жяматийсса низам, ашкара дуллай буссар тахсиркаршивуртту, талай буссар терроризмалущал ва экстремизмалущал.
Аьдатравун багьсса куццуй шадлугърал мероприятие зузалтрал дайдирхьунни къуллугърал бурж бартбигьлай жанну дуллусса коллегахъансса гьайкалдануцI тIутIив дишаврийну. ТIутIив дирхьунни Дагъусттаннал БакIчи Сергей Меликовлул, Дагъусттаннал виваллил иширттал министр Аьвдурашид МахIаммадовлул, МВД-лул зузалтрал ва ветерантурал. Хъирив цинявппа бувкIунни министерствалул клубравун. Шикку хьхьичIунсса зузалтран дуллунни наградартту.
