Дунияллийн бувккунни ххаллилсса педагог, гьунар бусса шаэр ва хIакьсса патриот Даниял Магьдиев дакIнийн утлатисса, «Данияллуясса дакIнийн бичавуртту» тIисса лу.
Даниял чIун дакъасса бивкIулул жуятува личIи увсса хавар бювххуна, къащи хьуна, Ккурккуллал жяматран бакъассагу, цайминнангу. Тай гьантрай соцсетирттаву чан хъанай дакъая ванал суратру, аьпалул махъру, дустурал, коллегахъал, учениктурал, цинявппагу ва ххираминнал дакIнийн бичавуртту, назмурду. Ттун пикри хьуна, Данияллул аьпалун вай циняв чичрурду, дакIнийхтунусса махъру цачIун бувсса лу итабакьирча, ххуйну хьунссия тIисса. Ванал оьрчIангу ттул пикри ххуй бивзуна. Луттирал сакиншин ва редакторшиву дурссар Хизри Илиясовлул. Проект дузрайн дуккан дан кумаг бувссар МахIаммад Сунгъуровлул, Шалласу Шалласуевлул, Аьбдуссалам Магьдиевлул, Диана Аькиевал.
Луттиравун салкьи дурну дуссар, Даниял аьпалул хьусса чIумал ванан хас дурну чирчусса назмурду ва дакIнийн бичавуртту дакъассагу, цаппарасса ванал цала назмурдугу. Бувсун буссар Данияллул оьрмулул ва захIматрал ххуллия, творчествалия ва жяматийсса давурттая. Лу чIюлу бувну буссар кулпатрал архивравасса суратирттал.
