Октябрьданул 29-нний Дагъусттаннал БакIчи Сергей Меликовлул дурсса батIаврий ххал бивгьунни Республикалул Агропромышленностьрал комплексрал стратегиялул лябуккулул масъалартту.
Сергей Меликовлул тIимунийну, республикалий тамансса каширду духьурчагу, дур цаппара захIматшивурттугу. Миннул дахчичру дуллай дур шяраваллил хозяйство мюнпатну лядуккан давриву. Бакъар бакIлахъия зана-кьала дайсса предприятияртту, ми машай дуккан дуллансса базарду ва цаймигу кIанттурду. Региондалул каялувчинал мукунма кIицI бунни паччахIлугърал циняв унитар предприятиярттавату мюнпатну зий бушиву анжагъ шанма бутIул ца, чIявуми МУП-ру зий бакъасса бур, миннул аьрщигу цила ххуллий ишла къадуллай бусса бур.
Республикалул АПК-рал тагьардания хъунмур ихтилат бунни ДР-лул ХIукуматрал Председательнал хъиривчу Аьбдулмуслим Аьбдулмуслимовлул. Мунал тIимунийну, шяраваллаву ялапар хъанай бур 54% агьалинал. 2020-ку шинал шяраваллил хозяйствалуву зий ивкIун ур 225 азара инсан. Миннал дянивсса харж хъанай бур 19, 6 азарда къуруш. Гьашину 9 зуруй шяраваллил хозяйствалул валовая продукциялул лагру хьуну дур 106,2 млрд къурушру.
Гьашину республикалий къюмайтIутIи бувгьуну бур 502 гектарданий. Миннувату чахир дуккан дайми журардалсса – 388 гектарданий. Гьашину ссуттилгу бугьан тIий бур 400 гектарданийсса тIутIул багъру. Ласун тIий дур 225 азарда тонна къюмайтIутIул.
Аьбдулмуслимовлул бувсунни му аралувусса захIматшивурттаятугу, дуван аьркинсса давурттаятугу.
Вице-премьернал тIимунийну, тамансса лябукку хьуну бур ппиринж бугьаврил иширттавугу. «Махъсса 5 шинал мутталий ппиринж бувгьусса хъуру гьарза хьунни 1,5-ллаксса. ЦIанасса чIумал республикалий ппиринж бугьлай бур 25 азарда гектарданий. 2020-ку шинал ларсун дур 111 азарда тонна бакIлахъиялул. Ва хъанахъиссар махъсса шиннардий яла ххуймур ккаккия», – кунни Аьбдулмуслимовлул.
Вице-премьернал бувсунни мукунма ахънилсса ххяххан даврил, ризкьи ябаврил ва аьрщи ишла даврил хIакъиравугу. Мунал тIимунийну, хIакьину республикалий бур 463 азарва бакI оьлил. Ца оьлища ттизлай бур 2855 кило накIлил. Ми цифрардал буслай бур селекциялул ва жинс цIу дуккан даврил давуртту ялавайсса даражалий душиву. Республикалий бур 4,6 млн бакI яттил ва цIурттал. Гьар шинах ласайсса дур 40 азарда тонна яттил дикIул, 14 азарда тонна ппалул ва 115 тонна яттил нисирал.
Дагъусттаннай унитар предприятиярттал аьрщарал луртанну мюнпатну ишла даврил хIакъираву бувсунни ДР-лул аьрщарал ва хъус-хъиншивурттал арардал министрнал кIанайсса Заур Эминовлул. Ванал тIимунийну, ГУП-ирдал инвентаризациялул чIалачIи бувну бур АПК-раву бушиву мукунсса 17 предприятие. Миннул республикалун дучIан дайсса дур шинай 800 азарда къуруш. ЧIяруми предприятиярттал каялувчитурал цахьхьунна ишла дуван дуллусса аьрщи ижаралий дулайсса дур цайминнахьхьун законгу лиян дурну. Гьарца гектардалухсса арцугу цалла ласайсса дур. Ми предприятиярттавасса чIявуми ппанккурутIшиврул тагьарданийн биян бувну бур.
