Ниттил кьинилун хасну

Абачара ХIусайнаев

Нину фронтрай

Зунчавух бивщусса марч бивщунма бур,
КьатIув замгьарданул лажин ччучлай дур,
Чулданийх хьхьу-кьини жул чулухунмай
Душмангу ккулларду чIай-чIай тIийна ур.

МикIлавчIсса ччатIуя рикIирах парча
ЧIутIуя хъиснияр бухъан захIматри.
Бухъав цукуннугу, гъили бав хьуву,
Хъахъулул накьлихун букав къаччайнма.

Даинна даимсса ва хъахъулул накь,
Бизарда даинна дяркъунна хIачIлай,
Ва гьанттайнссаннуцIух ца чансса хIаллай
Чул бував дяркъусса кIинтнил аьрщарай.

Хаварсиз, ча дуркрив – ттула хьхьичI хьунни
Шама арс аьрайсса ттул хъунна бава…
– Дургула, ттул нину, ина на увсса,
Ва бала ккакканъяв, ва дард духIланъяв?

Щях бивтунни ниттил адаврай яру,
Мукьал атил дунни жиг дартIсса чIаврду:
–ТалихI-тирххандаран, вина хъиншиврун,
Ттухава зунъявхха на ина увсса!

Цакуну шанава ццах куну ивзра,
Миналул цIалцIилул хъит увсса куна:
Цукун хьуссар ттуща, макIра бунугу,
Вакссава кьутIинсса махъ ниттихь учин?

Лахьхьу жу ласарду ва лахъсса кIану…
Шикку кьатI шайцири ххуй-ххуйсса оьрчIру!
Вай бакIурду хьхьичIгу циксса бухьунссар,
Дазуя личиннин, Берлин ласуннин!?

Тихун иян бусса, цIакьссара тIисса
Ттуща цукун хьуссар ниттихь тукун чин?
Чувсса ци шанур му?.. На ялтту увкра,
Къарал шанайвагу бакъарив ххал бан.

 

Аьбдул Мирзаев

* * *
Бава дур балай тIий оьрчI шананшиврул,
ОьрчIгу хIалли-хIаллих яру лакьлай ур,
ЧантI учин къауван шанан ччисса оьрчI,
Къатлувух мицIччаннай аму занай дур.
Цал-цал оьрчIал мурччайн бавал ппай учай,
Шанул лях лавг оьрчIал цал-цал пишгу чай.
Гьархьхьунусса ва хьхьу, гьархьхьунусса хьхьу
Га оьрчIал ку пишлил авур дурхьунссар.

 

Нураттин Юсупов

– Дадай!.. – тIий, кIараллия
ЧIивитIул бакI гьаз дурна.
Ганал бакIрайх гацIана
ЧIаххувщарнил ках куна:

– КьаикIу, жан вил дада
Кьуллалийн ларгуннича,
Дяркъусса щингу ларсун,
ЦIана зана хьунссарча.

ЧIивитIу аьтIий ия:
– Дада щинав ларгхьурча,
Циванни та варакъи
Хъарайх бувтун къалавсъсса?

– КьаикIу, жан, оьл ттизин,
Къатталун дурккуннича,
Гъили дан накIгу ларсун,
ВацIана дучIанссарча.

ЧIивитIу аьтIий ия:
– Га оьл ттизин ларгхьурча,
Туну, циванни оьрту
Та чIамуя къалавсъсса?

– КьаикIу, жан, вил дада
Маша бан ларгуннича,
ЛухIитIутIигу лавсун,
ЦIана зана хьунссарча.

ЧIивитIу аьтIий ия:
– ТIутIи ласун ларгхьурча,
Туну, циванни сумка,
Та мюрая къалавсъсса?

«Дадай…» тIисса чIивитIун
КъабувчIлай бурхха цичIав,
Га пакьир паракьат ан,
Щийн учайссар тти леххав?

Нарив га оьрчIал иттав
Ца мукьал кIунтI ххал къахьун
ЦIанакул дулувияв
Ва дунияллий думур.

 

МахIаммад-Загьид Аминов

* * *
Хьхьемал бувцIунни яру,
Даххана хьунни аьрщи.
Ххал хьунни архнияра
Ниттил лухIисса карши.

Хьулух дур хавар бакъа,
Ххаллал кIутIгу канихьну,
Ттунгу хар-хавар бакъа
ЧIири лирчIсса ттул нину.

Хавар хьунни, ххярххунни,
ЛарчIунни, канийн ппай тIий,
Азарда жура хьунни,
Арс, тIий, хъяй дуна аьтIий.

КIутIмур, багьну канива,
Ттирихлай бур, дард кунма.
Цими дурвав ганиву
Ттун дурсса ниттил дуаь?

Циминнахь цIувххунавав,
На ххал къавхьурив, куну?
Цимил ххуллийн дуркнавав,
ЦIаннава ттул чIу хьуну?

Ялугьлай, я къалакьлай
Уттара дурсса хьхьурдал
Ниттил иттал кьалакьай
Ттангъри дурну дур ххютал…

Агь, бавай, ххира бавай!
Силул хьуну дур чIантIив:
Духьунссара лигьавай,
На чув ливчIун урвав тIий.

Чагъарданул касакрай
На къачивчу ххаругу
Багьну бур ненттабакIрайх
ЖигдатIрурдал щаруну…

 

Абакар Мудунов

* * *
Уттара мадулларда,
Дадай, лахъисса хьхьурду,
Я мукьал, я пикрирдал
Байщун къабайссар бала!

Так ина дуаь дува,
Нагу дакIний увгьуну,
Иш оьнивун багьувкун,
Ттулсса бацIаннав, куну!

Аьли Айдаев

Ниттил гьаттай

ДакIния къадуккай ттун хъалул гургри,
Дяъвилул шиннардий ина дулайсса.
ДакIния къабуккай, жу къадан хIимпIру,
Виламургу гурга жуйх шандачIайсса.

Ттива-тти икIара нааьна дуллай,
Цанъявав вилмургу пай букайсса тIий:
Вил пайлущал архIал иявав, дадай,
Вил оьрмулул гьантри канай, кьацIа тIий?!

Сулайман Мусаев

Вил кару

Лагабургъил тIинттал мусил гъаралу
Вил исвагьи кIисри бур уртту дурчIлай,
Интнил гьаваслансса щюлли макьанну
Гай щюлли синттая экьигьан дуллай.

Лагабургъил цIарай бур кIункIур щарай,
Ялув къиссу буллай дур кьалакьигу.
Вил магьирсса кIисри бур ххункIру буцIлай,
Гурсундалул кунна, дишай накьичгу.

Баргълагавал чулух щюлли зунттул хъачI –
МаркIачIан дуркIукун, цув цIан ларгунни.
КIа хъачIнил махъ лархъун банавшасса кIач,
Бургъил циняв Муси кIийх лариртунни.

На мискин къаара дакъахьу мусил,
КIунттиву дуссаксса вил кIукIлу кару,
(Я ттул заллу, вайннул тIааьншиву цир?)
Вил иминсса кару – хияллал хъару.

ПатIимат Рамазанова

Урттул къаргу ларсун, най тана бава

Чаннал тIиму щуннин Щунул хъачI-бакIайн,
КIюрхнил тIитIу баннин бюхттул цIияллай,
ЯттихIухчувагу кьатIув укканнин,
Урттул къаргу ларсун, най тана бава!

Арулва оьрчI бунни ччаннай бацIан бан,
Оьл-кьунча, аьнакIи аьркинни ябан!
Кумаг банма акъа, нину, ссу бакъа,
Урттул къаргу ларсун, най тана бава!

ЗахIматну бур куну, гъалгъа банмагу,
Я аьтIун, я угь тIун чIун чув дур бавал?
Урттуха цурдагу чIалай-къачIалай,
Урттул къаргу ларсун, най тана бава!

Дардругу, къащигу мухIлих ттирхIуну,
Буруккинттал макьгу лухччайн дуртIуну,
Лачакрал ца мурцIних лажингу лихьлай,
Урттул къаргу ларсун, най тана бава!

Щюллисса ттугълилу, илтIа ликкурттай
Зунтту мукьав лавхъун нанисса хханссар, —
Дунияллул яхIгу бурхIайн гьаз бувну,
Урттул къар ларсуну, най тана бава!