ХьхьичIарасса аьдатирттайн зана шаврил байран

ХьхьичIарасса аьдатирттайн зана шаврил байран

Ноябрьданул 4-нний Аьрасатнаву кIицI дайссар Халкьуннал цашиврул кьини. Байран сакин дурссар 2004-ку шинал декабрьданий Аьрасатнал Президент Владимир Путиннул къулбас дурсса Федерал Закондалийн бувну.

Аьрасатнаву му цIусса байран цалчин кIицI дурну диркIссар 2005-ку шинал ноябрьданул 4-нний.
Халкьуннал цашиврул кьини сакин дурссар 1612-ку шинал хьусса иширттан хасну.Та чIумал Кузьма Мининнул ва Дмитрий Пожарскийл каялувшиврий Москав тархъан бувну бивкIссар Польшанал чапхундалуцIа.
Тарихраву ва байран дархIуну дур 17-мур ттуршукулий Аьрасатнаву питнардал, аварарттал (смута) чIун къуртал шаврицIун.
1611-ку шинал сентябрьданий Нижегородуллал земский староста Кузьма Минин лаивзссар шагьрулул ялапартуврайн, ополчение дузал дуванну тIий Москавуллал паччахIлугъран кумаг буван. Мининнул цIа рирщуну, ополчениялул хъунама бакIчину ивтссар 30 шинавусса Новгородуллал кIинияз Дмитрий Пожарский.
Пожарскийл ва Мининнул ттугъирдалу бавтIун бивкIссар та чIумух бурувгун хъунмасса аьрал – 10 азарунниха ливчу­сса инсантал, 3 азараксса къазахъ, 1000 –нниха ливчусса битулт ва чIявусса хъудугьулт, шяраваллал чиваркI. 1612-ку шинал ноябрьданул 4-нний Нижегородуллал ополчениялуща бювхъуну бур гьужум бувну ласун Китай-город ва дардагъил буван польшанал аьраллу Москавлия.
Му куццуй, Халкьуннал цашиврул кьини цIусса байран дакъарча, ва хъанахъиссар хьхьичIарасса аьдатирттайн зана шаву.

Читайте также: