Октябрьданул 27-нний Дагъусттаннал БакIчи Сергей Меликовлул каялувшиврий хьунни ЖКХ-лул объектру кIинтнил чIумуйн хIадур баврил Республикалул штабрал батIаву.

Сергей Меликовлул тIи­мунийну, хIакьинусса кьини ЖКХ-лул объектру дянивну республикалий хIадурну бур сайки 97%, амма личIи-личIину отчетру ххал дулларча, циняв объектру хIадурну бушиврун ккаллину бур. Иширайну ци тагьар дуссарив ххал дуван аьркинни. Региондалул каялувчинал бувсунни, дукIумур шинал кунма, Дагестанские Огни шагьрулул гьашинугу лавсун бакъашиву кIинтнийн хIадуршиврул паспорт.
«Республикалул коммунал хозяйство кIинтнил чIумуйн хIадур шаву мурадрай лизинграй коммунал техника ласуншиврул ккаккан дурну дур 141 млн къуруш. Цинярда ласун аьркинну дур 500 техника ва ми дачIин багьлай бур районнайх», – кунни Меликовлул ва тапшур бунни кIи дучIаннин ттинин дуван къархьумур дурну чулийн ду­ккан дуван.
ДР-лул ХIукуматрал Председатель АьбдулпаттахI Амирхановлул бувсунни кIи дучIаннин чув цукунсса давуртту дуван аьркинссарив.
Республикалул коммунал объектру хIадуршиврул хIакъираву ихтилат бунни мукунма Ростехнадзорданул Ккавкказуллал управлениялул каялувчинал хъиривчу Артур Амуттиновлул ва ДР-лул ПаччахIлугърал тIювалул инспекциялул каялувчи Сергей Касьяновлул.