Октябрьданул 9-нний Дагъусттаннал Минздраврай хьунни Росздравнадзорданул ва СКФО-лул республикарттал минздравирттал вакилтал гьурттусса совещание. Шикку ххал бивгьунни Ухссавнил Ккавкказуллал республикарттай демографиялул тагьар къулай дувансса ва инсантал литIлай нанаву чан дувансса чаранну.
Дагъусттаннал ХIукуматрал председательнал хъиривчу Мурад Казиевлул бувсунни вай масъалартту билаятрал ва республикалул хъуниминналгу мудан хьхьичIххуттайн ласайшиву. Инсантал оьрмурдацIа буллалисса азардавух кIицI ларгунни оьттул, гьутрурдал ва ракрал азарду. ЛичIинура чIурчIав дурунни коронавирусрал азар дирми литIун къабитансса чараннайгу.
Росздравнадзорданул хъунаманал хъиривчу Ирина Серегинал бувсунни коронавирусрал вакциналул инсан ивкIусса цавагу иш къавхьушиву, цуппа зузисса идара вакцина бувминнал тагьарданул ялув бавцIуну бушиву, билаятрал циняв хIакинтал, «Фармаконадзор» тIисса автоматикалул системалийн бувкIун, кувнначIан кув информация биян буллай бушиву.
Дагъусттаннал цIуллу-сагъшиву дуруччаврил министрнал хъиривчу Жавгьарат Исяевал бувсунни, дайдихьулийра ракрал азарду ялун личин даву мурадрай, Республикалул онкодиспансерданий ТIиртIу нузал кьинирду дувайшиву, агьалинаща ми гьантрай цалла цIуллушиврул тагьар ххал дуван бюхъайшиву.
Совещаниялий ххал бивгьунни къашавайми ххассал бавансса цаймигу чаранну.
