ЧIярусса шиннардий на луглай бивкIра Буттал кIанттул цIанийсса Хъунмасса дяъвилул майданнай ливчIсса ттула ппу чув урвав увччуну тIий: цIухлай бивкIра, чичлай бикIра. Жуаврал чагъарданий чивчуну бикIайва: «Му бат хьуну ур Моздокрая арх акъа, амма чувчIав аьш-бакI дакъари», – тIий.

Ахиргу, гьашину, Аьрасатнал Федерациялул Обороналул министерствалул «Память народа. Подлинные документы о Второй мировой войне» тIисса интернет-порталданихчIин лявкъунни ттун ттула буттаясса базисса хавар: «Абдуллаев Омари Исаевич – зам. командира роты по политической части 1159сп, 351 сд. род. в 1917 г. в сел. Шовкра, Лакский район, ДАССР. Погиб 12 декабря 1942 г. в бою в Северной Осетии, Алагирский район, с. Н. Тамиск».
«Тамиск» тIисса сана­то­рийлучIан биявайсса кIанттай жун хьунадаркьунни хъуннасса гьайкал. Ва ци гьайкал дурвав тIий, чIаравппай хьусса, цакуну я бавцIунни цалчинсса ххуттайсса ттула буттал цIаний – «политрук Абдуллаев Омари Исаевич» тIисса чичрулий. Му мутталий ттула дакIний ливксса асарду буслай бусан къахьунссар, му бувчIинссар оьрмулуву мукунсса мутта нясив хьуну бивкIманан.
Буттал извещение дуркIсса чIумал бувагу 22 гьантта хьуну бивкIун бур на ниттил бувну. Буттан диркIун дур 25 шин. Цувагу дяъвилийн гьаннин ШавкIуллал школалий директорну зий ивкIун ур.
Ттул ппу, Исял арс Аьбдуллаев Оьмари, аьраяллил къуллуъ бартбигьлай ивкIун ур 351-мур стрелковый дивизиялул 1159-мур полкраву, роталул командирнал заместительну. Ва дивизия сакингу бувну бивкIун бур 1942-ку шинал июль зуруй Ух­ссавнил Къапкъазнаву.
Гитлердул та чIумал куну бивкIун бур: «Ттул цIанасса мурад Къапкъаз улча бугьавур… Агар ттуща ласун къабюхъарчан Майкопрал ва Грозналлал навт, ттун аьркинссар къуртал бан дяъви». Къапкъаз ласласисса му пландалунгу дирзун диркIун дур «Эдельвейс» тIисса кодовый цIа.
Алагирданияту арх дакъа­сса Тамиск тIисса шяравалличIа дислокациялул хьуну бивкIун бур кIицI бувсса дивизиялул 1159-мур полк. Дайдирхьуну дур хъинну къизгъинсса талатаву – Тамискаллал ва Садонский рудникрал райондалий немецнал аьралуннайнсса данди бацIаву. Душманнал фронт ххядуккан дурну, лавкьуну бур миннан Заккав­кказнавунсса ххуллу.
Ттул ппу усса дивизиялул яла хъунмур масъалану бивкIун бур душманнаща буруччин Гуржи-Аьраяллил ххуллу («Военно-Грузинская дорога»). ХIасил, бакIрайн къабувккун бур фашистурал «Эдельвейс» операция.
Тамискаллал санаториялий тIивтIуну бивкIун бур хъунмасса госпиталь. Му госпитальданий ливтIуминнан ва Моздокско-Малгобекский оборонительный операциялуву бат хьуминнан цIа куну, хIасул дурну дур «Уссурваврал гьав», тикку дурну дур хъуннасса гьайкал-мемориал. Му гьайкалданийгу цалчинна-цалчин дур чирчуну ттул буттал цIа.
Ухссавнил АьсатIиннаву дацIан дурну дия Буттал кIанттул цIанийсса Хъунмасса дяъвилул кьинирдай тикку жан дуллуминнан хас дурсса диялсса гьайкаллу. ЧIалайгу бия миннуха ляличIисса къуллугъ буллай бушивугу.
ДакIнийхтуну барчаллагь тIий бура Ухссавнил АьсатIиннал республикалул хъуниминнахь, агьалинахь, школьниктурахь, цучIав хъамакъаивтун, цала аьрщарай ливтIуминнан лайкьсса кьимат бивщусса ва миннал аьпа абадлий буручлачисса!

Нагу Оьмарил душ Аьбдуллаева Халла