Фабрика тIитIлатIисса шадлугърай гьуртту хьунни ДР-лул ХIукуматрал хъунаманал хъиривчу Батир Эмеев, ДР-лул Халкьуннал Мажлисрал депутатътал, промышленностьрал аралул вакилтал.
Хъамаллуран ккаккан дунни ттизаманнул ларайсса технологиярттай усру итадакьаврил даву. Усру итадакьлакьисса цехирдал аьмсса площадь бур мукьазарда кв/м. Экскурсиялия махъ фабрикалул усру ккаккиялун дирхьусса залдануву Батир Эмеевлул журналистурахь бувсунни 2020 шинал республикалий чялишну хьхьичIуннай хьушиву куклусса промышленность. Му исват бансса ишну хьуну бур дукIу буллай байбивхьусса усру дайсса кIива хъунмасса фабрика гьашинунин, къурталгу бувну, зун итабакьаву: ца Буйнакск шагьрулийсса ООО БОФФ, цагу МахIачкъалалив – «SERG».
КIицI лавгунни фабрика «SERG» усру итадакьайсса рынокрай зий хьуну душиву кьунияхъайсса шинну. Ттизаманнул журалийсса хъаннил ва арамтурал усру дайсса фабрика бансса инвестициялул проектран харж дурну дур 200 млн къуруширттал.
Цалчинма вице-премьернал кIицI лавгунни усру дуваву ккалли хъанай душиву жула буттахъая ирсирай, никирая никирайн, нанисса сянатран. Ва цIусса фабрикартту тIитIаврил исват буллай бушиву жула усру республикалул кьатIувгу тIалавну душиву.
«SERG» тамансса шиннардий уртакьну зий бур «КАRI» тIисса усру даххайсса хъуннасса сетьращал. Ванил каялувчи, Аьрасатнал хьхьичIунсса ишбажаранчи Игорь Яковлев увкIун ия хасну фабрика тIитIаврил шадлугърайн.
Эмеевлул кIицI лавгунни усру давриха Дагъусттаннай чIявусса зий бушиву, багьлай бушиву так миннал даву ххютула дуккан дан.
– ДР-лул ХIукумат хIадурну дур, усру дуллалисса идарартту ххютула буккан бувну, миннун паччахIлугърал кумаг буллан. Му мурадрай ДР-лул ХIукуматрал щурущи буллай буссар стратегический проект “Город обувщиков”. Ва проектрал лагрулий ккаккан бувну буссар жула республикалий уссал производство сантирайн рутансса инфраструктура хьхьичIуннай дан ва микку зузиминнансса даврил шартIру дузал дан, – увкунни Батир Эмеевлул. КIицI лавгунни шинал ахирданийннин ттигу шанма фабрика тIитIин тIий бушиву.
Фабрикалул хъунама директор Сулайман ХIусайновлул бувсунни фабрикалул итабакьлай бушиву азаруннийн бивсса уссал куцру. Фабрикалуща даврил дузал ан бюхъан тIий бур 100-120 инсан. ХIакьинусса кьини фабрикалул итадакьлай бусса бур шанттуршазарва чут уссал, му лагру лахъ дан тIий бур ряхттуршазаруннийн дияннин.
ЧIал къавхьуну жу гьарза-гьартану бусанну фабрикалия, ванил хъунама Сулайман ХIусайнов цувагу, гьай-гьай, лаккучу ухьувкун, щак бакъар шикку зузисса уссал усттарталгу сайки цинявппа лак бушиврийн.
