Ттуплий буккаврил бяст-ччал

Октябрьданул 22-23-нний ЦIуминалийсса ЦIуссачIурттащиял шяраву хьунни къуллугърал бурж бартбигьлай жан дуллусса МВД-лул зузала ХIадис ХIадисовлул аьпалунсса мини-футболданул турнир. Ванил сакиншинначи хьунни З.Р.Къаравалиевлул каялувшиннаралусса ЦIуссалакрал райондалул жагьилтурал жяматийсса организация. Турнирданий гьуртту хьунни ЦIуссалакрал райондалиясса 12 команда.

Спортрал бяст-ччал тIитIаврий гьурттушинна дан бувкIун бия ЦIуссалакрал райондалул бакIчи МахIаммад-ХIажи Айдиев, ДР-лул Халкьуннал Мажлисрал депутат Артур Исрапилов, ДР-лул жагьилтурал иширттал министрнан кIанайсса Камил Саидов, Дагъусттаннал ХIукуматрал бизан баврил масъалартталсса буллалисса управлениялул хъунаманан кIанайсса Руслан Султанов ва м.ц.
Турнирданул хIасиллайн бувну, цалчинсса кIану буллунни ЦIуссачIурттащиял командалун, кIилчинсса – ЦIуссалакрал командалун, шамилчинмур кIану бувгьунни Гьамиящиял командалул. Вайннан буллунни кубокру, грамотартту ва арцуйнусса бахшишру. Турнирданий гьуртту хьуминнал барчаллагь увкунни сакиншинначитурахь ва чIарав бавцIусса спонсортурахь.