ДР-лул КIулшивуртту дулаврил ва элмулул министерствалул социал сетирдай чIявуну булайсса суал цIана бур: «КIулшивуртту дулаврил идарарттахь нитти-буттая арцу датIлансса ихтияр ду­ссарив ягу дакъассарив?» тIисса.

ЦIуххултрахьхьун жаваб дуллай вайгу тIий бур:
КIулшивуртту дулаврил цуппа-ца идаралухь я нитти-буттая, я оьрчIая арцу тIалав дуллансса цукунчIавсса ихтияр дакъассар. Классравун ягу школалун ци-дунугу хъус, матахI ласунсса арцу датIлансса ихтияр дакъассар нитти-буттахъал комитетирттахь ва попечительтурал советрал вакилтурахьгу.
Чирилул давурттан ва рахIму-цIимилул сакиншиннардицIун дархIусса федерал закондалийн бувнугу, кIулшивуртту дулаврил идаралухь дакъассар вайксса арцу дула тIунсса ихтияр. Каши дусса, иш бавчусса инсантуран школалун цала чулухасса кумаг бан ччай бухьурча, гайнная тIалавну буссар, арцу канихьхьун къадуллуну, так га идаралул счетрайн дичин.
Къадагъа дуссар школалул иширттангу арцу датIлан.
Нитти-буттахъал комитетрал ягу попечительтурал советрал ва школалучIасса цаймигу сакиншиннардал ци-дунугу ца шадлугърайн хIадуршинна дуллай, гикку буккансса харж-хуржлийн классравусса оьрчIал нитти-буттахъая арцу датIлан ихтияр дакъассар. Мукунсса чIири-хъунсса даврин цала комитетрал, советрал дяниву дартIсса арцуцIух щаллу хьун аьркинссар.
КIулшивуртту дулаврил идарарттал пишакартурахь ихтияр дакъассар чирилун, кумаг бан дакIнийн багьсса инсаннал дуллалисса арцу канил дугьан. Ганахь тавакъю бан аьркинссар, школалул счетрайн цалла дакI дирсса арцу дирчуну махъ, дирчушиврул тасттикьшинна дан­сса квитанция тIалав дан.
Школалун кумаг бан дакI­нийн багьсса чIарахацIулгу, арцу счетрайн дирчуну махъ, квитанциялул копия биян бан аьркинссар школалийн. Ганахь мукунна ихтияр ду­ссар, школалул каялувчитурахь ссан харж дан най буссарив арцу кIул бувну, хъирив уккангу.
Укун чIарахбацIултрал дуллусса арцух ци ларсъссарив, ссан харж дан багьссарив бусласисса информация школалул бувсун бикIан аьркинссар цала сайтрайгу. Чирилун кумаг бувминнахь ихтияр дуссар, цалла дирчусса арцу мюнпатрайн къадурккун, тили-хъили дурну духьурча, школул каялувчитал аьрза чивчуну судрахьхьун булунгу.
Агарда арцу тIалав дуллай, нитти-буттая датIлатIисса ишру бухьурча, гьарнахь дуссар ихтияр ДР-лул КIулшивуртту дулаврил министерствалулгу, шагьрурдал ва районнал ихтиярду дуруччай къуллугъиртталгу «горячая линиялул» телефоннайн оьвкуну, укунсса масъаларттая баян бан.