Октябрьданул 20-нний хьунни ДР-лул Халкьуннал Мажлисрал 3-мур сессия.
Сессия бачин бувну ия парламентрал Председатель Заур Аскендеров.
БакIрай ххал бивгьунни «Дагъусттан Республикалул Халкьуннал Мажлисрал депутат, Абусяидлул арс Сулайман Керимовлул ихтиярду чIун дукканнинна дацIан даврил хIакъираву» тIисса масъала.
Заур Аскендеровлул тIимунийну, Сулайман Керимов лаивзун ур, ДР-лул Халкьуннал Мажлисрал депутатнал ихтиярду чIун дукканнинна дацIан даврил хIакъиравусса аьрзагу чивчуну. Лаизаврил савав хьуну дур га Аьрасатнал Федерациялул сенаторнал къуллугърайн увчIаву, Дагъусттан Республикалул Халкьуннал Мажлисрал ккаккан увну АьФ-лул Федерал Собраниялул Федерациялул Советраву. Депутатътурал кьамул бунни му масъалалул хIакъиравусса хIукму.
Хъиривмур масъала бия «Дагъусттан Республикалул Халкьуннал Мажлисрал комитетирттал хIакъираву» тIисса. Ванил хIакъираву махъ лавхъунни ДР-лул Законодательствалул, законшиврул, паччахIлугърал дузалшиндарал, кIанттул цилакаялувшиврул ва регламентрал комитетрал председатель Артур Исрапиловлул. Ванал бусаврийну, ДР-лул Халкьуннал Мажлисрал цалчинмур сессиялий цIакь дурну диркIун дур Халкьуннал Мажлисрал структура ва комитетирттал сияхI, бувчIуну бия миннул председательтал, ва сессиялий тIурча, аьркинну бур бувчIин комитетирттал составру.
Ва масъалалул хIакъираву кьамул бунни Халкьуннал Мажлисрал хасъсса хIукму.
Мунийну бакIуйн дурккунни сессиялул даву.
