Октябрьданул 13-нний Дагъусттаннайн бувкIунни Федерациялул Советрал делегация. Муниву бур сенатортал Виктор Бондарев, Александр Варфоломеев, Андрей Шевченко, Владимир Городецкий, Дмитрий Кузьмин, Алексей Головин, Андрей Яцкин, Илияс Оьмаханов.
Делегация бувкIун бур Дагъусттаннал социал-экономикалул лябуккулул хIакъираву.
Сенатортал кIул хьунтIий бур республикалийсса тагьарданущал ва кумаг бантIий бур захIматсса масъалартту дузрайн буккан буван.
Сенатортурал делегация бувкIунни Къизилюртлив роддом буллалисса кIанайн. Му бувну чулийн буккан бантIий бур 2023 шинал. Шичча делегация лавгунни Казбекуллал райондалийсса «Главрыба» тIисса туристътурал объект ххал дуван.
Андрей Шевченкол тIимунийну, сенатортурал цIанасса аьрххилул ахирданий хьунтIий дур батIаву, муний гьуртту хьунтIий бур паччахIлугърал 10 федерал идаралул вакилтал. БатIаврий ххал бигьинтIий бур республикалун цукунсса кумагру буван бурив.
Яла сенатортурал делегация бивунни Сулакьрал къуманив, тамаша бунни Европанал яла куртIмур кьакьалий.
Мичча бувкIунни Семендердайсса ва Каспийскаллал ипподромрайсса школартту ххал буван. Делегация бувкIунни мукунма Каспий хьхьиривун чапалсса канализациялул щин хIала хъанахъисса кIанайнгу (Редукторный поселокрай). Шикку хьхьиривун хIала хъанай дур ца миллион кубометраксса чапалсса щин. Цалчинма вице-премьер Нюсрет Оьмаровлул бувсунни ва масъала цукун дузал бансса пикри буссарив.
Сенатортурал къуллугърал аьрххи лахъи лавгуна хъиривмур кьинигу.
