Россельхознадзорданул Ккавкказуллал межрегионал управлениялул ххал дувайссар хозяйстварттаву бугьайсса гьаннарал ххуй-оьккишиву (качество).

Гьашинусса 9 зуруй му идаралул дурссар паччахIлугърал чулухасса гьаннарал ялувбацIаврил лагрулийсса 92 ххалбигьаву. Хъиривлаявурттайну кIул бувну бур Лаващиялгу, Ххунзахъиялгу, Тарумовкаллалгу районнай 48 диялдакъашиву дурну душиву. Низам лиян дувулт кIункIу бувну бур административ жаваблувшиврийн.
Мива 9 зуруй Управлениялул хъиривлаявуртту дурну диркIссар республикалул базардаву маша буллалиминнал хIакъиравугу.
Вай иширттал чIалачIи буллай бур хозяйстварттал бугьайсса бушиву цалла ларсъсса бакIлахъиялул гьанна, вайннул журагу, ххуй-оьккишивугу кIул къадурну. Вай гьаннарал заллухърунначIа бакъар гьанна бугьан бучIишиврул хIакъиравусса документругу.
Укунсса диялдакъашивурттал хозяйстварттан зарал биян буллай бур, шиная-шинайн ласайсса бакIлахъия чан хъанай дур.
Управление дакIнийн бутлай бур гьанна баврил хIакъиравусса АьФ-лул законну дуручлан аьркиншиву.