ОьрчIру бурувччуну битан

ОьрчIал дянив къалмакъал хьунсса тагьар хIасул хьун къаританшиврул, школалий миннай гуж-ябацIу буллалисса, цаннайн ца кусси буллалисса, кьювкьу-кьадар буллалисса ишру хьун къабитан, МахIачкъалаллал шагьрулул депутатътурал Мажлисрал председатель Марис Илиясовлул хIукмулийну МахIачкъалаллал школардай сакин бувну бур муданма зузисса комиссия.

Комиссиялуву бур шагьрулул Мажлисрал ва Жагьилтурал парламентрал депутатътал. Вайннал кумаг буллантIий бур захIматсса тагьарданувун багьсса оьрчIан.
Комиссия сакин бувния шинмай вай бивну бур шагьрулул 9 школалийн (№№8, 16, 26, 30, 31, 42, 56, 59, 17).
Хъуними классирттал дуклаки оьрчIащал вихшалдарайсса ихтилатру бувну, гьаз бунни ссивцIу бутлатисса, цаннай цаннал гуж буллалисса, дарсру къалахьлахьисса иширттацIун бавхIусса цIанасса жагьилтурал масъалартту. Ихтилатру хьунни жагьилтурал дянив наркомания ппив хьун къаритаврил хIакъиравугу. Бувцунни оьрмулувасса мисаллу, ккаккан дунни социал видеороликру. Депутатътурал, хьхьичIунсса спортсментурал бувсунни оьрчIахь цаламур школ заманалия, спортравусса цалчин­сса ххувшавурттая ва наградарттая, гихуннайсса цала планная.
Гьаз бувсса масъалалул агьамшиву кIицI лаглай, Марис Илиясовлул бувсунни махъсса 20 шинал лажиндарай оьрчIру кувннал кув кьювкьу-кьадар буллалисса масъалартту щаллагу дунияллий хьунабакьлакьисса масъалартту бушиву. Вай школалул кьатIув ливчусса питнардайн кIурабаллай бушиву.
– Ва ххурпIайлухьхьун ччима дуклаки оьрчI ириян бюхъайссар, ци гужирал, гьунарданул, бюхъу-тяхъалул заллу ухьурчагу. Ван­ихьхьун биривсса оьрчIру депрессиялувун багьайссар, психика зия хьун бюхъайссар. Школалий укун­сса тагьарданущал оьрчI цувалу акъарча талан аьркинсса, нину-ппугу, учительталгу, цивппа оьрчIругур, – кIицI лавгунни цала ихтилатраву Марис Илиясовлул.
МахIачкъалаллал шагьрулул Мажлисрал ва Жагьилтурал парламентрал депутатътурал бувсунни цивппа укунсса иширттаву кумаг бан, оьрчIал чIарав бацIан хIадуршиву.
МахIачкъалаллал шагьрулул Мажлисраву зий дур захIматсса тагьардануву ливчIсса оьрчIал ва нитти-буттал оьвчинсса вихшалдарал телефон: 68-16-53.