Мансурдул душ Къардашова Ссапижат

Хар-хавар бакъа ялун дирсса захIматсса цIуцIаврища итххя­ххан къавхьуну, кьадарданул жуятува батIул бувунни оьрмулул аргъиравусса уздансса лакку душ, ГьунчIукьатIрал шярава­сса Мансурдул душ Къардашова (Мансурова) Ссапижат.
Бувссар Ссапижат ванияр 52 шинал хьхьичI, цалва пиша ххуйну кIулсса, машгьурсса энергетик Мансурдул ва 54 шинай учительшиву дурсса РаихIатлул кулпатраву МахIачкъалалив.
Шагьрулул 8-мур школагу къуртал бувну, Ссапижат бувхссар Дагъусттаннал художествалул училищалувун, муния махъ Дагъусттаннал педуниверситетрал художественно-графический факультетрайн. Цила шяравасса бусравсса жагьил Руслан Къардашовлущал ташулул хьуну, Каспийск шагьрулийн бивзун махъ зий буссия шагьрулул школарттай сурат дишаврил дарсру дихьлай, муния махъ – оьрчIал садикрай тарбиячину. Махъсса шиннардий Ссапижат зий буссия почталий. Чув зурчангу, цилла даву ххирасса, лагма-ялттунащал хIал бавкьу­сса Ссапижат бия хIурматрай, бусравну. Ва бия дакI хъинсса, ччинащал маз лякъин бю­хъайсса инсан, кару магьирсса хъамитайпа, усттарну дайва канил давуртту.
Цуппа шагьрулий бувсса, хъунма хьусса бунугу, ванил дакI мудангу Лаккуйн кIункIу тIийнна дикIайва, шайссаксса аякьа дувайва Лаккуйсса тIювалух. Ласнащал, Русланнущал, лайкьну тарбиягу бувну, ччаннай бацIан бувссия кIива душ ва ца арс.
Лавгунни Ссапижат оьрмулул ва пикри-щугълурдал нязаннив, ччаргу гъаралу кьадиртун, хъирив хъап-шаплий ичIувамигу, махъсса гъан-маччамигу бивтун.
Ва духIан захIматсса кьур­чIишиву кIидачIлай, дакI­нийх­тунусса жижара буллай буру ниттихь, ласнахь, арснахь, душваврахь, уссур-ссуннахь, махъсса цинявппагу гъан-маччанахь. Ссапижатлул бунагьирттал аьпа буваннав, алжаннул ххари баннав.
ЧIаххув-чIарахми, гъан-маччами ххирасса, хIалимсса, пиш тIийнмасса Ссапижатлул чаннасса симан жула дакIурдива къагьантIиссар.

ГьунчIукьатIрал жямат


Дазу-зума дакъасса дард-хажалат кIидачIлай буру жула даврил уртакь, Аьбдулманаплул арс Руслан Къардашовлухь, ванал оьрмулул дус Ссапижат  жагьилсса оьрмулий аьпалухьхьун лагаврийн бувну. Ва хъуннасса хIасрат духIансса ссавургу, гужгу Заннал булуннав вихьхьун.
Цил рухI рахIатний дишиннав, имандалий лавгун лякъиннав!
Вил къюву жулгу къювур!

«Илчилул» коллектив


ГьунчIукьатIрал ккурандалул чулухату хъуннасса кьурчIишивугу кIидачIлай, жижара буллай ура Къардашов Русланнухь ва махъсса гъан-маччаминнахь, вайннал аьзизсса инсан, Мансурдул душ Ссапижат аьпалул шаврийн бувну.
Алжаннул ххари баннав, гьав нурданул дуцIиннав, махънал оьр­мурдай барачат бишиннав!

ХIусайнахъал ХIажибутта


Хар-хавар бакъа ялун дирсса, духIан захIматсса кьурчIишиву кIидачIлай, жижара буллай буру «Илчи» кказитрал хъунама редакторнал хъиривчу Руслан Къардашовлухь, ванал кулпат Сапижат жуятува батIул шаврийн бувну.
Махъ ливчIминнахьхьун цIуллушиву дулуннав! Оьрмулул увччуну акъасса зул агьулдания инсан яла къагьаннав!Сапижатлул гьав нурданул дуцIиннав!

Лакрал райондалул администрациялул коллектив


ДакIнийхтунусса пашманшивугу кIидачIлай, жижара буллай буру Руслан Къардашовлухь, ванал ххирасса кулпат  Ссапижат жуятува личIи шаврийн бувну. Цил бунагьирттал аьпа баннав, махъминнал оьрмурдай барачат бишиннав.

«Дараччи» клубрал цIанияту Гульшан Хасаева


Хъуннасса кьурчIишиву кIидачIлай, дакIнийхтунусса жижара буллай буру «Илчи» кказитрал хъунама редакторнал хъиривчу Руслан Къардашовлухь, ванал кулпат Сапижат нязаннивсса бивкIулул дунияллия лагаврил ялув.
Му захIматсса дард духIансса ссавур дулуннав Заннал зул кулпатрахьхьун!
Махъ ливчIминнал оьрмурдай барачат бишиннав! Сапижатлун алжан нясивну лякъиннав!

Лакрал театрданул коллектив


«Илчи» кказитрал ххаллилсса зузала, хъунама редакторнал хъиривчу Къардашов Русланнухь на дакIнийхтунусса жижара буллай ура, вил оьрмулул дус, Ссапижат, ахиратравун лагаврийн бувну.
Яраппий я Аллагь, мунин къабуллумур оьрму винма, вил арс-душваран булуннав. Мукунсса дард духIангу хъинну захIматну бухьурчагу, вингу яхI буван багьантIиссар. Мунин къадуллуну лирчIсса дакIнил гъилишиву оьрчIал оьрчIан дулунсса мутта ви­хьхьун булуннав.

ХIажимурад ХIусайнов, ш. Вихьул