Абад дунни цIарду

Вай гьантрай МахIачкъалалив тIиртIунни республикалул магьирлугърал хьхьичIунсса ишккаккултрал – ДАССР-данул магьирлугърал лайкь хьусса зузала Моисей Путербротлул, ванал кулпат, чичу ва ТАСС-рал корреспондент Александра Путербротлул, вайннал арс, ДАССР-данул магьирлугърал бусравсса ишкка­кку, художник ва сценограф Эдуард Путербротлул аьпалул ула.

– Путербротхъал кулпатрал багьа бищун къашайсса захIмат бивхьуссар Дагъусттаннал жяматийсса ва магьирлугърал оьрму хьхьичIунмай баврил, ттизаманнул буттал улклул сурат дишаврил магьирлугъ хьхьичIуннай даврил цIаний. Вай бия вардишсса лагрулувун къалагайсса инсантал, заманалуву, оьрмулуву, магьирлугъраву ва инсантурал дакIурдиву яргсса ва ликъаххайсса аьш кьариртун дунияллия лавгсса. Интеллигентътал, цIушинначитал, оьрму хьхьичIунмай буллалими!
ХIакьину аьпалул ула тIитIав­рийну жущава бюхълай бур хъунисса цIарду абад дан, гьарцагу чулуха ляличIисса, гьунар бюхттулсса Путербротхъал кулпат дакIнийн бутан, – увкуна Дагъусттаннал культуралул министр Зарема Бу­ттаевал.
– Дагъусттаннал магьирлугърал тарихрал пирамидалий лайкьсса кIану бувгьуну бур Путербротхъал кулпатрал. Вил (Моисей) Зиновьевич Путерброт чIярусса шиннардий каялувшиву дуллай уссия Дагъусттаннал паччахIлугърал филармониялий. Ванаща бюхъайва га яла лавайсса даражалул ччима артистнайн Дагъусттаннайн гастроллай оьвчин. Ванал хIарачатрайну да­гъусттанлувтал хьунабавкьуссар Совет Союзраясса ва кьатIаллил билаятирттаясса хьхьичIунсса артистътуращал. Ванал кулпат Александра Терентьевнал, ТАСС-рал Дагъус­ттаннайсса корреспондентну зий, Хъун дяъвилул вирттаврах луглай, диртссар щалла СССР. Миннаясса ванил очеркру хьу­ссар жула ватанлувтурал дяъвилий дурсса виричувшивурттаясса хавардал щаращину.
Эдуард Путербротлуя гъалгъа тIурчаннив, ванал художникнал гьунарданул дазу дакъая, соцреализмалия тIайла хьуну, авангардрайн бияннин. Кьурахъул шинай зий ивкIссар Дагъусттаннал миллатирттал театрдал художникну, дузал дурну мяйцIалунниха ливчусса спектакллансса сценография ва костюмру. Га мудангу итталу икIайва.
Учай, ивкIуну махъ инсанная личIайсса так цIар, куну. Путербротхъал кулпатрал дагъусттаннал магьирлугъраву кьариртунни хъинсса цIа ва яргсса аьш, – увкуна 1972-1986 шиннардий ДАССР-данул культуралул министрну зий ивкIсса АьбдулатIип ХIажиевлул.
– Эдуард Моисеевич ия бюх­ттулсса гьунарданул художник, пикрилул художник. Театрдануву зий, га мудан луглан икIайва идара пишакаршиврул ххуттай хьхьичIунмай бансса ххуллурдах.
Цува художник ва ганал нину-ппу бия магьирлугъраву ялапар хъанахъисса, магъирлугъраву барачат бихьлахьисса инсантал, – увкунни Дагъусттаннал Театрал ишккаккултрал союзрал хъунама, Аьрасатнал халкьуннал артист Айгум Айгумовлул.
Искусствовед, ДР-лул магьирлугърал бусравсса ишккакку Татьяна Петенинал кIицI лавгсса куццуй, гьарца миллатрал тарихраву дур цIарду анжагъ шаэр, чичу, художник куну кьаритан къашайсса.
– Оьттуву дагъусттанчу акъана, художествалул кIулшиву дакъана, Эдуард Путербротлуща бювхъуну бур багьа бищун къашайсса ирс махъ кьабитан. Кьуниясса шиннардил дянив га ия дагъусттаннал интеллигенциялул рувхIанийсса лидерну, – увкунни Петенинал.
Художникнал арс Антон Путербротлул барчаллагь увкунни аьпалул ула тIитIин бувкIминнахь, ппу дунияллийн увккун 80 шин там шаврил юбилейран хас дурсса давуртту сакин дурминнахь.
– Вай инсантал кIулну бивкI­миннал дакIурдиву вайнна­сса чаннасса аьпа яхьушиврийн ттул цукунчIавсса щак бакъар. Цала давурттайну вайннал хIалал був­ссар хъунмасса хIурмат. Ттул ттатта, цува шикку увну, хъуна хьуну акъахьурчагу, шиккун увкIун, республикалул магьирлугърал цIаний оьр­му бувтсса. Ттул буттал нину, азаллийсса инсантуран цала ппухълуннал, мачча-гъаннал гьаврду ля­къин кумаг бувсса. Ппу, ва билаят дазу дакъа ххирану ивкIсса, дунияллул гьар зуманиясса цала дустурайн оьвтIий, тайннан Да­гъусттан билаятрал эмаратшиву ва дагъус­ттанлувтурал дакI хъиншиву машгьур дуллай ивкIсса, – увкунни Антон Путербротлул.