Гьава бявкъусса, пачру лахълахъисса чIумал, токрайсса пачру сававну цIу ларчIсса ишру чIяву шай. Мукунсса иширттая мюхчан хьуншиврул, токрайсса приборду ишла дуллалийни щаллу дан аьркинссар цаппара тIалавшиннарду. Токрайсса пачру заводрай бувсса бикIан аьркинссар.Токрал пачлий янна кьакьан дуллан къабучIиссар, миннуй ягу чIарах цIу лачIайсса затру дишин къабучIиссар. Лавхъсса пачлих ччя-ччяни буругаван аьркинссар. Шаппату нанисса чIумал пач токрава буккан аьркинссар.

ДакIний битияра, токрайсса пачурдил къатлул токрал сетьрайн хъунмасса гуж бутайссар. Изоляция ччучлачисса кьанкь духьурча, токрал ххаллу кIириларгун духьурча, розеткартту дарцIуну духьурча, ччя-ччяни лешлай ягу ччучлай духьурча, счетчикрайсса предохранительлу – му къатлул электросетрайн гуж багьлагьисса ишри, токравун дучIлачIисса прибордая нигьачIаву дуссар.
Инсаннал оьрмулун ва цIуллу-сагъшиврун нигьачIисса тагьар хIасул дуллалиссар токрал пачру ишла буллалийни дуруччин аьркинсса тIалавшиннарду къадуруччаврил.
ПуркIу буккайсса кIанттурду марцI бувну бакъахьурча, пач бавриву ва бущавриву саргъундакъашивуртту духьурча, пачлил чIарав цIу лачIун бюхъай­сса затру дирхьуну духьурча, вай сававну хъунмасса бала хьун бюхъайссар.
ЦIараясса бала арх баву мурадрай цаппарасса тIалавшиннарду дуруччин аьркинссар.
Дяркъу хьуну, ишла булланнин, ххал бувну, бакьин бан аьркинссар пачру. Ччя-ччяни ххал буллан аьркинссар пуркIулул ххуллурду, чардагърайсса турбарду, хъякусса ягу пуркIу буклакисса, лухIи лавгсса кIанттурдувагу бакъарив ккаккан. Мукунсса кIанттурду аьрщарал бущин аьркинссар. Цивппа заллусса къатраву, пач лахъаннин хьхьичI кIа дуккан дурну, марцI бан аьркинссар турбарду ва пуркIурал ххуллу. КъабучIиссар пачру хъинну кIири лаган битан. ХъуручI-тIаннуй лахъайсса пачру, бигьану цIу лачIайсса бензиндалий, навтлий ягу цайми хьюмусса затирттай лахълан къабучIиссар. КъабучIиссар лахъан нузру тIиртIусса пачру, мукунма пач лахъайсса кIанттул хьхьичI цIу къалачIайсса мах рирщуну да­къахьурча. КъабучIиссар пачлих бурган оьрчIайн тапшур бан. Лахълахъисса пачлил чIарав тIантту ягу ччяни цIу лачIайсса хьюмушия дишин. КъабучIиссар лавхъсса пач къулагъас дакъа битан.
МахIачкъалаллал Ленинс­кий райондалул ялув бацIаврил ва профилактикалул отделданул зузалт дюъ дихьлай бур, личIлулну бикIияра ва цинярда тIалавшиннарду дуруччияра пачру лахъайсса чIумал тIий.

Б. А. ХIажиев, дознаватель
ХIадур бувссар Андриана Аьбдуллаевал