Октябрьданул 20-нний ДР-лул БакIчи Сергей Меликовлул каялувшиврий дурсса Республикалул ХIукуматрал гьартасса батIаврий ххал бивгьунни гьашину 9 зуруй республикалул бюджет бартбигьаврил масъала, «2021 шинал ва пландалул мутталийсса 2022 ва 2023 шиннардил Дагъусттан Республикалул бюджетрал хIакъираву» тIисса ДР-лул закондалуву дахханашивуртту даврил масъала.

Аьмну лавсун, Сергей Меликовлул бюджет ккалли бунни мюнпатссаннун. МуницIунма кIицI дунни му бартбигьлагьисса чIумал хьун дурсса диялдакъашивурттугу.
Республикалул каялувчинал бувсунни гьашинумур шинал бюджетраву хьусса цаппара хъинчулийсса дахханашивурттаягу. ДукIумур шинал бюджетрах бурувгун, гьашину доходру гьарза хьуну дур 20 %, ягу 6,2 млрд къурушрал.
Бюджетрал арцу цила хху­ллий харж даврил (освоение) хIакъираву Сергей Меликовлул тIимунийну, октябрьданул 1-ннийнин харж дурну дур шинал пландалул арцул 62,4 %, 8 министерствалул ва идаралул харж даву 50 процентраяргу чансса хьуну дур.
Республикалул каялувчинал бувсунни давурттан ккаккан дур­сса арцу, итагударкьуну, харжгу дуллан аьркинну душиву цила чIумал, шинал ахирданийннин къадиртун.
Сергей Меликовлул мукунма бувсунни Социал-экономикалул стратегиялул масъала ххал бигьин­тIий бушиву парламентрал октябрьданул сессиялий. Республикалул каялувчинал тIимунийну, бюджет бартбигьлагьисса чIумал хъунмур къулагъас дикIан аьркинссар дагъусттанлувтурал оьрмулул даража лахъ баврих.
Республикалул бюджетрал хIакъираву бувсунни ДР-лул финансирттал министр Юнус Сяъдуллаевлул. Мунал бувсмунийну, гьашину 9 зурул мутталий республикалул бюджетравун дучIан дурну дур 117,5 млрд къуруширттал, пландалий ккаккан дурсса доходру хъанай дур 168,6 млрд къурушру. Министрнал бувсунни бюджетраву дурсса дахханашивурттаягу.
БатIаврий ххал бивгьунни цаймигу масъалартту, миннувасса ца бия агьалинал сияхI цIунил чичаврил (перепись) масъала.