Лакрал театрданул сахIналий тIайлабацIулущал най бур тти­гъанну премьера хьусса, «Легендарный Комдив» тIисса, Марат Шахмановлул пьесалийнусса, Совет Союзрал Виричу, хьхьирил жамичи МахIаммад ХIажиевлун хас бувсса спектакль.
ХьхьичIва баян бувсса куццуй, спектакль бивхьуссар Дагъус­ттан Республикалул БакIчинал Грантрах.

Спектакльданул премьералущал театрданул коллектив барча буллалисса телеграмма тIайла дурккун дия ЛухIи хьхьирил флотрал каялувчи, адмирал Игорь Владимирович Осиповлул.
«МахIаммад ХIажиевлул цала хIаписарнал даву дайдирхьуссар ЛухIи хьхьирил флотрай, шанна шинал дянив ванал бивтссар, аьра­ли частьрал хъунаманая, хьхьирил жамилул хъунаманайн бияннинсса ххуллу. Хъунмасса Бу­ттал КIанттул цIанийсса дяъвилул шиннардий Ухссавнил Флотрал хьхьирил жамирдал дивизиондалий каялувчишиву дуллай, агьамсса захIмат бивхьуссар Хъуннасса Ххувшаву ласун», – увкуну бур телеграммалий.
Осиповлул кIицI лавгун бия, инсаншиврул ва хъиншиврул пикрирду лавсун най, театрданул хъунмасса мяърипатрал ва художествалул бияла бушиву инсаннал рувхIанийсса дуниял хIасул дан, дунияллиясса кIулшиву гьарза-гьарта дан, театрданул багьа бакъасса даву дуллай бушиву хъун хъанахъисса ник ватан ххирану тарбия дан. Мунинсса мисалну бувцуну бия театрданул коллектив цала ватанлувнал гьунарданух бургаву.
Спектакльданул режиссер-постановщик, Дагъусттаннал халкьуннал артист Аслан МахIаммадов:
«Тарихраву агьамсса кIану бувгьусса, 13 шинал оьрмулуву нину диркIуну, ппугу «халкьуннал душманшиврий» дуснакь увну, захIматсса кьадар бакIрачIан бувкIсса инсаннал оьрмулуцIун дархIусса даву хъинну захIматссагу, жаваблувссагу дия. Цала МахIаммад ХIажиевлул увкусса куццуй, шайссарив «халкьуннал душманнаща виричу тарбия ан».
Театрданул ва бишинсса пикри чари чирча, МахIаммад ХIажиев хъанай ур Хъунмасса Буттал КIанттул цIанийсса дяъвилий цалчинсса Виричунал ЦIуку лавсъсса дагъусттанчу. Му бакъассагу, ванал нину бивкIун бур лакку хъамитайпа, жула хъунасса шаэр МухIуттин Чариновлул ссурахъу. Жунма лавгмур хъамабитлатисса чIумал, жагьилтуран лавгмуния къакIулну бушиву, хаснува Хъун дяъвилул тарих баччан буллали­сса кIанттурду, хIисаврайн лавсун, «лавгмунийн жува ттупанг битарча, ялун бучIантIимунил жуйнма ттуп битантIиссар» тIисса АбутIалиб Гъапуровлул калималуву тIийкун къахьуншиврул, багьлай бур хъун хъанахъисса никирая пикри буван, вайннан дяъвилул хIакьмур ккаккан буллан.
Спектакль хIадур бан хъинну жапа хьунни, цанчирча драматургиялул материал спектакль бишиннияр художествалул фильмран ххишала дакьлакьисса дия. СахIналул тIалавшиннарду тIурча, личIисса дур, мунийн бувну материал сахIналул журалийн дуцин хъунмасса захIмат бишин багьунни.
Ва постановка чулийн буккан бан, аьпа биву, Гулизар АхIмадовнал искусствоведнал ларайсса пишакаршиврул ка савав хьуссар. Мунийн бувну ва спектакль на хас буллай ура Гулизар АхIмадовнал аьпалун. Умуд бур, «АхIмад-Хан Султан» спектакльданулмур кунма, ва спектакльданулгу сахIналийсса оьрму лахъи­сса хьунтIишиврийн».
Премьералий МахIаммад ХIажиевлул роль дургьуну ия артист Ислам МахIаммадов, кIилчинсса премьералий ва роль дургьуну ия Яруссаннал драмалул театрданул артист Ибрагьим Муртузялиев.
ЧIивинийсса МахIаммад ХIажиевлул роль дургьуну ия Камал Маматаколов.
Спектакльдануву ялагу гьурттуну бия артистал: Зульфия Архилаева (МахIаммад ХIажиевлул нину), Руслан Ларин, Аьбдул Мурадов, Артур Абачараев, МахIаммад Сурхатилов, Сухраб Шуаьев, Ибрагьим Рабаданов, Кьурбан Шуабов, Малик Кьурбанов.
МахIаммад ХIажиевлул ччи­сса душнил, Катеринал, роль хьунни театрданул жагьилсса актриса, ГИТИС къуртал бувсса Аьзи­за АхIмадовал дебют.
Спектакльданийн букIлакIисса чIявуми тамашачитал бур лавайсса ва дянивсса дуккаврил идарарттал студентътал, цивгу букIлакIисса «Пушкиннул карталийхчил».