Лакрал театрдануву хъунмасса тIайлабацIулущал хьунни италиянал драматург Карло Гольдонил пьесалиясса «ХIаз бизансса иш» тIисса спектакльданул премьера.

Сайки кIира шинал лажиндарай дух дуллай дан къабюхълахъисса бала-хатIасса ковид цIуцIаврил ласука бухIан був­сса инсантал бявххуххи бансса, дакIнийхтуну бигьалаган­сса, тамашачитурал унгу-унгуну хIаз ласунсса бия мяйжаннугу спектакль.
Бельгиянал купац Филибертлул (Дагъусттаннал халкьуннал артист Шамсуттин Къапланов) душ Жаннина (Дагъусттаннал лайкь хьусса артистка Зинаида Чавтараева) эшкьи хьуну бур мискинсса палангнал лейтенат Лаконтрих (Ибрагьим Рабаданов). Амма буттал цуппа мискинчунан щар къабулунтIишиву кIулсса Жаннинал, хIилла дурну, ппу хъяврин ай, ганах цила дус Констанция (Зульфия Архилаева) эшкьи хьуну бур тIий. Ганилма буттагу душ мискинсса лейтенантнан щар булун рязи къахъанан ивкIукун, Филибертлул жагьилтуран арцу дулай, гай ливхъун гьаншиврул, амма, арцугу ларсун, лейтенантнащал ливхъун лагай цаламур душ. Хъяврин аврийн сси бивзсса ппу ччяни кIукIлу лавгун, душ багъишла битай.
Спектакль байбивхьуну къуртал хьунцIа хъанахъимур къабувчIлачIисса Филибертлул ужагърай мяйжаннугу хIаз бизансса иш бия. Хъяхъаврил ласавай бия щала театр.
Режиссер-постановщик – ДР-лул лайкь хьусса артист Ма­хIаммад Сурхатилов.
Сценограф – ДР-лул лайкь хьусса художник Аскар Аскаров.
Спектакльдануву роллу дургьуну бия Рамил Кьур­б­ма­хIаммадов, Рукьижат МахIа­мадова, Малик Кьурба­нов.
Спектакль бивхьунни синхрон журалий таржума буллай.
ДакIнийн бутанну, «ХIаз бизансса иш» спектакльданул премьералийну Лакрал театрданул гъинттул ларкьуссия 85-мур сезон. Амма, коронавирусрал цIуцIаврил лагмасса эпидемиологиялул тагьар савав­сса ссуссукьушиннардайн бувну, премьера бивхьуссар онлайн-кьаралданий.