ЦIуссалакрал райондалийсса агьалинал ккал

ЦIуссалакрал райондалул администрациялул къатраву, райондалул бакIчинал цалчинма хъиривчу Султан ХIамзатовлул каялувшиннаралу, хьунни Щалагу Аьрасатнал переписьрал кампаниялул даву сакин даврил хIакъиравусса совещание. Шикку гьуртту хьунни райондалий перепись даврил масъаларттал жабавлувшиву тапшур дурсса ХIасан ХIасановгу.

Совещаниялул даву дайдихьлай, Султан ХIамзатовлул кампаниялул давриву гьуртту хъана­хъиминнахь бувсунни коронавирусрал азардания цивппагу, агьалигу мюхчан баву мурадрайсса медициналул ва Роспотребнадзорданул чулухасса тIалавшиннарду биттур дан аьркиншиву. Мукунма ХIамзатовлул кIицI лавгунни переписьрал давривух гьуртту хъанахъиминнахь дикIан аьркиншиву ковидрая буруччаву мурадрайсса вакцинартту бувшиву исват буллалисса сертификатру.
Щалагу Аьрасатнал перепись най дикIантIиссар октябрь зурул 15-нния ноябрь зурул 14-нний дияннин. ЦIуссалакрал райондалий тIиртIуну дуссар переписьрал давриха зузисса 10 участок. Ши­кку зий буссар 10 контролер ва 60 переписчик.
ХIасан ХIасановлул кампаниялул давривух гьуртту хъанахъиминнан балжину бувчIин бунни перепись даврил бланкру тIайлану дуцIин дансса куц ва къатравух занансса маршрутру.
Переписьрал даврил хIасиллу дурну махъ хIукуматран бигьа хьун тIий бур агьалинан пособияртту, субсидияртту ва цIу-цIусса программарттайхчIинсса кумагру буллан.
«Умуд бур ва ххуллухсса переписьрал даву лайкьсса даражалий гьанссар тIисса. Ва даву бакIрайн ларсминнал дан аьркинссар жаваб­лувну. ХIарачат бан аьркинссар цуя ца инсаннаясса сведенияртту лях гьан къабитан. Гьашину­сса перепись хъанахъиссар цифровой технологияртту ишла дурну дуллали­сса цалчинсса перепись. Агьалинаща бюхъантIиссар перепись дан ГосуслугарттайхчIин, МФЦ-лийхчIин, ягу цала ичIун­­май бувкIсса перепис­чик­ту­райх­чIин», – бувсунни Султан ХIамзатовлул.
Переписьрай булун ккаккан бувну бур 33 суал.