Октябрьданул 12-нний ДР-лул БакIчи Сергей Меликовлул дунни республикалул паччахIлугърал властьрал органнал каялувчитуращалсса батIаву. Муний ххал бивгьунни региондалул лябуккулун агьамшиву дусса масъалартту.

Сергей Меликовлул тIиму­нийну, цIусса дуккаврил шин дайдирхьуния шинмай, хаснува махъсса нюжмардул мутталий, гьарза хьуну бур КОВИД-рал къашавайсса инсантал. Мунил савав хъанай дур агьали эпидемиялийн къаршисса чаранну буручлай бакъашиву. МуницIунма дакIнийн бувтунни инсан цувагу, цалва мачча-гъанмигу буруччинсса чаранну хъанай бушиву так вакциналул ххалаххи баву.
ДР-лул Минздраврал кка­ккиярттайну, октябрьданул 12-ннийнин республикалий вакцинартту бувну бур 469-ннаха ливчусса инсантурал, ми хъанай бур прививкартту дуван аьркинминнал 26%.
Сергей Меликовлул тапшур бунни эпидемиялийн къарши­сса давурттал ялувбацIавуртту кьянкьа дуван.
Дагъусттаннал БакIчинал гьаз бунни строительствалул лагрулий захIматшивуртту дусса масъаларттугу.
– Агана жува гъалгъа тIий бухьурча туризмалия, спортрая, культуралия, цаймигу социал агьамшиву дусса иширттая, цIусса объектру къабулларча, ми арардаву цукунчIавсса лябукку буван къабюхъантIиссар. Цукунни жущара лядуккан дуван бю­хъайсса цайми арарду, цIусса объектру къабувну? – кунни Меликовлул. Миккугу, республикалул каялувчинал тIимунийну, хъунмур къулагъас дикIан аьркинссар строительствалул давурттал ххуй-хъиншиврух, хаснура –школартту бакьин баврих.
БатIаврий Сергей Меликовлул бувсунни «Русские ярмарки» тIисса инвестициярттал проектраятугу.
Шяраваллил хозяйствалул аралуву дуллалисса давурттая бувсунни вице-премьер Аьбдулмуслим Аьбдулмуслимовлул. Мунал тIимунийну, хIакьинусса кьи­ни чялиш бувккун батIлай бур тIутIи ва гьивч, миннул бакI­­лахъия дукIунияр гьарзану дикIантIий дур. Амма дур захI­­матшивугу: чIярусса гъараллу ларчIун, ппиринжрал бакI­ла­хъия ласун цалсса бю­хълай бакъар.
Ятту зунттавату кIинтнил даэрдайн куч буллай бур.
Ххал бивгьусса масъаларттал хIасиллу дунни Дагъусттаннал БакIчинал.