«Родительство» тIисса клубрал батIаврий «Аьрасатнал ниттихъул» суккушиндарал региондалул отделениялул «Здоровое материнство» тIисса приоритет проектрал лагрулий хьунни «Сохрани жизнь, мама!» тIисса цIанилусса конференция. Ва хас бувну бия Щалвагу Аьрасатнаву нанисса «Розовая ленточка» акциялун.
Шиккува кIицI лаган, «Здоровое материнство» проект щаллу дуллалиссар Дагъусттан Республикалул ЦIуллу-сагъшиву дуруччаврил министерствалул, ДР-лул Маммологтурал-радиологтурал ассоциациялул, «Единая Россия» ВПП КМО-лул ва ДР-лул Печатьрал министерствалул чIарав бацIаврийну.
Конференциялул даврий гьуртту хьуна «Аьрасатнал ниттихъул» суккушиндарал Дагъусттаннайсса отделениялул председатель Таиса МахIаммадова, ДР-лул цIуллу-сагъшиву дуруччаврил министрнал хъиривчу Раиса Шахсинова, республикалул цIуллу-сагъшиву дуруччаврил, дуккаврил идарарттал ва жяматийсса организациярттал вакилтал.
– Хъазамрал рак хъанай дур щаллагу дунияллий хъанний чIяруну лякъайсса оьсса дурухлу. Мунийн бувну, 1983-ку шиная шинмай октябрь ккаллиссар хъаннил хъазамрал ракращалсса талатаврил зурун. ЦIанасса чIумал ва азар бигьану хъин дуллай бур. Азарданущалсса талатавриву агьамшиву дуссар хIакинтурал, психологтурал, гъан-маччаминнал чIарав бацIаврил ва къашавайсса хъамитайпалул цилва хъин хьунсса, азарданияр ххув хьунсса гъирарал, – увкуна Таиса МахIаммадовал.
Цилвамур ихтилатраву Раиса Шахсиновал кIицI лавгунни ва кьинисса конференциялул агьаммур мурад бушиву хъаннин бувчIин баву цалла цIуллу-сагъшиврул ялув чIаванияцIава бацIан аьркиншиву, цила чIумал хъирив бувккун, обследование дурну, хъин шаврийну кулпатравусса махъминнангу ккаккан буван аьркиншиву цахва цивппа цукун буруган аьркинссарив, ва укунсса къуццу тIутIаву кулпатрахасса аякьа, къайгъу хъанахъишиву.
Хъиривмур кьини, октябрьданул 23-нний, жулла республикалул шагьрурдал ва районнал азарханардай хьунни Щалвагу Аьрасатнал лагрулийсса «Розовая ленточка» акциялул давуртту – хъаннища ва кьини бюхълай бия укра хъазамрал диагностика дуван ва маммологначIан консультациялийн буххан. МахIачкъалаливми хъаннища хасъсса хъиривлаяву дуван ва маммологнал консультациялий бучIан бюхълай бия Республикалул перинатальный центрданийн ва Республикалул онкологиялул центрданийн.
