Октябрьданул 14-нний Сергей Меликов хьунаавкьунни АьФ-лул Федерациялул Советрал Председательнал Цалчинма хъиривчу Андрей Яцкиннущал. Хьунабакьаврий ххал бивгьунни республикалий Федерациялул Советрал делегациялул дуллалисса давурттацIун бавхIусса масъала.

– Жун тамансса агьамшиву дуссар Дагъусттаннай хIакьину сенатортурал группалул дуллалисса давурттал. Федерациялул Советрал хъуннасса къулагъас дуллай бур, гьашину мартрай комитетирттал кьамулгу дурну, АьФ-лул ФС-лул ХIукмулий ккаккан дурсса давурттах. Ттун ччай бур барчаллагь чин Валентина Ивановна Матвиенкохь, жухра дуллалисса аякьалухлу, – кунни Сергей Меликовлул.
Андрей Яцкиннул бувсунни республикалул каялувчинал дуллалисса даврицIун кабакьу буллантIишиву.
– Дагъусттаннай дуллансса давуртту чансса дакъар. Федерациялул Советрал хIукмулул тIалав буллай бур давурттал ялув бацIаву ва бартдигьлагьаву. Федерациялул Советрал мукьва профил комитетрал каялувчитал бувкIссар жул делегациялувух. Жул пландалий буссар шикку уттигу кIира кьини зунсса, – кунни Андрей Яцкиннул.