Вай гьантрай Американаву, Техас штатрайсса Даллас шагьрулий, хьусса джиу-джитсулул, (раздел (NOGI), (федерация IBJJF), дунияллул чемпионатрай арцул медаль ларсунни ЧIурттащиял шяраватусса машгьурсса спортсмен Ситтикь Мудуевлул.
Ххюйла данди увккун ур Ситтикь муттаэтуращал, мукьийла ххув хьуну ур. Ванащал финалданий ччалли увксса Австралиянавасса муттаэнал тренергу, дунияллий машгьурсса спортсментал Джордж Сент Пьер, Гордон Райан ва цаймигу хIадур бувсса, Джон Данахер усса ур. Финалданий тIайлабацIу къахьурчагу, укун сийлийсса чемпионатрай арцул медаль ласавугу хъуннасса хьхьичIуннайшивур. Шиккува кIицI лаганну, Ситтикь Мудуев США-вусса IBJJF-лул федерациялий хьхьичIунсса кIану бугьан бювхъусса цалчинма ушиву Аьрасатнава.
ХьхьичIвагу Ситтикь Абу-Дабилив хьусса джиу-джитсулул дунияллул чемпионатирттай хьхьичIун увкссия. Ва михакрангсса мухIулттул заллур. ЛичIи-личIисса шиннардий вава джиу-джитсулул ва грепплинграл чемпионатирттай жучIава Дагъусттаннай, Москавуллал областьрай, Украиннавугу чемпионнал цIа дурурччуссия.
ХIакьинусса кьини Ситтикь тренировкарттай ур Американаву. ЧIа учинну ванан цIу-цIусса ххувшавуртту ва хьхьичIуншивуртту.
