Октябрь зурул 21-нний Дагъусттаннал кIулшивурттал даража хьхьичIунмай баврил институтраву хьунни цIанасса заманнул литературалул масъаларттан хас бувсса семинар. Семинарданул даврил лагрулуву дунни СалихI Гуртуевлул цIанийсса «Есть Родина, а значит, счастье есть» тIисса Щалагу Аьрасатнал поэзиялул конкурсрал ва Апанни Къапиевлул цIанийсса «Резьба по камню» тIисса таржумачитурал конкурсрал хIасиллу.

Конкурсирттал хIасиллу дуллалисса мажлис бачин бувну бия ДИРО ФиСГО кафедралул доцент, филологиялул элмурдал кандидат, Дагъусттаннайсса Аьрасатнал Чичултрал союзрал отделениялул председатель Миясат Муслимова. Конкурсирттаясса информациялия ва шиву гьуртту хъанахъиминная балжину бувсунни ванил. Шикку гьуртту хьунни ДР-лул печатьрал ва информациялул министр ОьмархIусман ХIажиев, ДР-лул культуралул министрнал хъиривчу Мурад ХIажиев, ДИРО-лул цалчинма проректор, социологиялул элмурдал доктор, профессор ХIамзат Жамалуттинов, Дагъусттаннал гуманитар институтрал теологиялул кафедралул профессор, философиялул элмурдал доктор Асият Буттаева, регионнайсса Аьрасатнал чичултрал союзирттал председательтал.
Мукунма Дагъусттаннайн бувкIун бия конкурсирттал жюрилул члентал ва хьхьичIунсса кIанттурду бувгьусса шаэртал.
Шаэр, прозаик, таржумачи, литературалул ишккакку, культуралийхчIин миллатру цачIун буллай ивкIсса, гьунар бусса чичу Апанни Къапиевлул цIанийсса конкурс сакин бувну бур Ккавкказуллал чичултрал клубрал ва Аьрасатнал чичултрал Дагъусттаннайсса отделениялул союзрал сипталийн бувну. Конкурсрал мурадгу бур литературалул художествалул таржумартту хьхьичIуннай даву ва миннуйхчIин гьунар бусса автортурал произведенияртту машгьур баву.
Вара кьини хIасиллу дурсса Балкьарнал чичу СалихI Гуртуевлул цIанийсса конкурс машгьур хъанай най бушиву исват хъанай бур, кутIасса чIумул дянив шиву гьуртту хъанахъиминнал сияхI хъунна шаврийн бувну. Мукунма, вай конкурсирттаву гьуртту хъанай бур, Аьрасатнал шагьрурдая бакъа­ссагу, дазул кьатIувсса билаятирттаясса шаэрталгу. СалихI Гуртуевлул цIанийсса конкурс гьашину Дагъусттаннай шамилчинни хъанахъисса.
Апанни Къапиевлул цIанийсса конкурсраву цалчинмур кIану бувгьунни цыганнал мазрая оьрус мазрайн шеърирду таржума бувсса, Американаву ялапар хъанахъисса Елена Чертковал, кIилчинмур кIану армани мазраясса таржумартту бувсса, Санкт-Петербурглив ялапар хъана­хъисса А.Костаревлул ва шамилчинмур кIану — бувгьунни шаэр Алексей ХIажиевлул лакку мазрай чивчусса рубаирду таржума бувсса, Къазан шагьрулиясса Галина Булатовал.
СалихI Гуртуевлул цIанийсса конкурсраву цалчинсса кIану бувгьунни Москавлиясса Анна Дорлгаревал ва ванин дуллунни арцуйнусса премия (30 азарда) къуруш. КIилчинмур кIану бувгьунни Санкт-Петербург­лиясса Кира Османовал, ванингу премиялун дуллунни 20 азарда къуруш. Шамилчинмур кIану кIибавчIунни Москавлиясса Евросиния Капустинайх ва Санкт-Петербурглиясса Сергей Тетяниковлуйх. Вайннан дуллунни ца цаннан 10 азарда къуруш премиялун. Цинявппагу конкурсраву гьуртту хьуминнан дуллунни СалихI Гуртевлул цIанийсса медаллу.

«СТиХИ» тIисса басмаханалул хасъсса призран лайкь хьунни шаэр, журналист ПатIимат Рамазанова.
Мурад ХIажиевлул дакIнийх­туну барчаллагь увкунни шаэртурал гьунардан кьиматру бишлай бивкIсса жюрилухь ва ХIурматрал грамотартту дуллунни ттизаманнул литература хьхьичIуннай давриву бивхьусса захIматрахлу. Културалул министерствалул чулухасса хасъсса барчаллагь баян бунни «День и ночь» журналданул редактор, шаэр Марина Саввинан.
Асият Буттаевал ихтилатраву кIицI лавгунни жагьилсса шаэртурал гьунарду аьч баву мурадрайсса конкурсирттал хъуннасса агьамшиву душиву. Бувсунни мукунма цIанасса ппурттуву луттирдал ва буккултрал дянив хIасул хъанахъисса масъаларттая.
Конкурсирттаву гьуртту хьусса ва хьхьичIунсса кIанттурду бувгьусса шаэртурал творчествалун лавайсса кьимат бишлашисса ихтилат бунни ХIамзат Жамалуттиновлул.
– Хъинну ххарину ура жула институтраву, буллалисса лавайсса даражалул конкурсру сававну, хьхьичIунсса культуралул ва творчествалул интеллигенциялущалсса хьунабакьавуртту шаврий. Пахрулий кIицI лаган ччай ура шаэр, таржумачи, публицист, Аьрасатнал Чичултрал союзрал Дагъусттанналмур отделениялул председатель, журналистикалуву яла бюхттулмунин ккаллисса «Золотое перо России» награда лайкь дурсса Миясат Муслимова жула кафедралий зий бушиву, – увкунни ванал.
Барча бавуртту къуртал хьуну махъ, хъамаллурайн «Инт» кафелувун оьвкуну, Дагъусттаннал миллатирттал дукрардал ссупра тIивтIунни Саидат Дундаровнал.