Октябрь зурул 13-15-нний Ставропольлал крайрайсса Тамбукан хуторданий Росгвардиялул спецназрал пишакартурал дянив най буссия «Краповый берет бишинсса ихтияр ласаврихлусса» бяст-ччаллу.
Краповый берет бишин ихтияр ласунсса бяст-ччаллавух гьуртту хъанай уссия ЦIуссалакрал райондалиясса Буттаев Ися. Росгвардиялул спецназрал пишакартурал дянив, Исял, цинярдагу цанна дан ккаккан дурну диркIсса захIматшивуртту лавайсса даражалий дурхIуну, лайкь бунни Краповый берет.
Краповый берет бишинсса ихтияр дулайссар спецподразделениялул пишакартурава яла хьхьичIунми язи бувгьуну.
Краповый берет бишин ихтияр дулайсса захIматшивуртту духIаврил хIал ххал буллалисса ва берет лайкь бувминнан тапшур бансса хIукму кьамул бувну бур «Краповый берет» пиш-каш буллан аьдатравун бутансса сиптачи хьусса Аьрасатнал Виричу, «Братство краповых беретов «Витязь» хасъсса подразделениялул Ассоциациялул хъунама, террорданийн къаршисса правлениялул Ветерантурал союзрал член Сергей Лысюклул.
Аьралитурал ва Росгвардиялул спецназрал хасъсса подразделениярттал пишакаршиврул ларайсса магьиршиву ккаккан дуллалисса лишанну хъанахъиссар «Краповый берет».
Ва ласунсса бяст-ччаллавух гьуртту хъанахъими ссятурдил мутталий, ярагъуннищал, цимигу километралийх бакIлавай ва бакIъялавайсса захIматшивурттугу духIлай, левчуну бачайссар. Ккаккан дурсса заданиялий левчун най бунува, явкIмулну бикIан аьркинссар, нажагьлий цайнма хавар бакъулий ххявхсса къачагънаяту буруччиншиврул.
Укун захIматсса бяст-ччаллаву цала тивталшиву ва зирангшиву ккаккан дурну, спецназрал дянив сийлийсса «Краповый берет» лайкь бувсса жагьил ур ЦIуссалакрал райондалиясса Чараваллал шяравасса Чупаннул ва Нарсиятлул арс Ися Буттаев.
Пишалул магьиршиву ккаккан дурну, хъуннасса ххувшаву лайкь дурсса жагьилнан чIа учинну гихунмайгу тIайлабацIуртту.
