Зульмира CултанахIмадова, МахIачкъалаллал 9-мур поликлиникалул хIакин:
«На миннат буллай бура»
КIира шин хьунни ттул ковидрал къашавайсса инсантуращал зий. Хъинну къащи шай чIун къадирну инсантал дунияллия лагаву. Ва вирусрал хаснува рахIму къабай хронический азарду думиннай. Хъин хьуминналгу цIуллу-сагъшиврун асар шай.
На нарагу, циняв ттул гъан-маччаминналгу (на дувара тIий) вакцинация дурссар. Инсантал, прививкалул бакъарча, оьрмулуцIа буллалисса ва баласса вирусралли. На тавакъю буллай бура, мавих хъанарду интернетраву чичлачисса гьармунийн, хIал къакIулминнал бусласимунийн. Зувагу, зула гъан-маччамигу бурувччуну бикIаншиврул дувара прививка. ДакIний битияра, цинярдагу захIматсса лахъай азарду жучIара мудангу жула хIукуматрал дуккан дурсса прививкардайнур дух дуллай бивкIсса.
Аьйшат Муслимова, выпечкалул ттучандалул заллу:
«КъачIалай бакъахьунссархха баларду!»
На хIукуматрал идаралий зий бакъара, нава заллусса выпечка тIивтIуну зий бура МахIачкъалалив, Сепараторнайлив. Прививка чара бакъа дуван аьркинссар тIутIиссагу акъая, амма на дував. ЧIалай буну тIий прививкартту къадурминнал бакIрачIан бала букIлакIисса. Цинявннаяр лахъну чIаххувщар дия прививкарттал муттаэ, ванил бувсмуних вичIи дишайхту, дуван дакIнийминналгума къадуванссия. Азарханалийн багьунни ванил ласгу, душгу. Гуж-балагь душ ххассал бан хьунни, лас – лавгунни. Утти чIаххувщар, къатра-къатрайх занай, хIалал битияра тIий дур, цила махъаллил къаувссания, ласгу прививка дуван най ия тIий дур. Цийва тахсир хьунни тIий дур. Ххуйну пикри бувара, зуйва тахсир хьун мабацIару, ва вирус хъярч бай вирус дакъар, инсантурал биччибакъулшиву ва вих бакъашивугур заралсса вирусру.
Фатима Аьбдуллаева, ккарччал хIакин:
«Ккаккан дурсса чIун ларгукун, уттигу банна вакцина»
ЖучIа, Ставрополлайгу, къаххуйсса тагьар дур, кьинилия кьинилийн коронавирусрал иш хъиннува оькки хъанай бушиврия ва, вакцина къабарча, агьалинан азарханардай кIанттурду биял къахъанантIишиврия тикрал буллайнма бур.
Ттул оьрчIру заназисса шагьрулул лицейрал директор, ххуйсса хъамитайпа буссия, хIакьсса педагог, коронавирусрал азардануща ххассал къавхьуну, реанимациялийва, оьрмулул 62 шинаву, къуртал хьунни ца-кIира нюжмардул хьхьичI. Ставрополлал школартту ссутнил каникуллая махъгу ялагу ца нюжмардий карантиндалий бикIантIиссар, утти ялун нанисса нюжмардий вузругу лакьинсса хавар бур. Нарив вакцина бувссия ттула даврийсса уртакьтуращал архIал инттува, ккаккан дурсса чIун ларгукун, уттигу банна. Вакцина бувсса жул даврий цучIав къашавайгу къавхьунни, жулла-жулла отпускругу, хьхьирийн, цайми шагьрурдайн лавгун, чурххан, жулла цIуллу-сагъшиврун мюнпатну гьан дарду.
Аьлил Чупанов, математикалул учитель:
«МалхIансса вакцина»
Аьрасатнал билаятрал хьхьичIва-хьхьичI хIасул бунни коронавирусран малхIансса вакцина, амма агьалинал аьвамшиву ва ласу-къасурду сававну духхин дурунни. Циняв хIакинтал, академиктал, микробиологтал хьуну бур. Ва ялагу, паччахIлугърал инсантурайн уква вакцинарду буллай бур, чIярусса арцу итадакьлай бур ва ягинсса цIарал лама лещан буван. Биял хьунуксса къаитабакьлай хIукуматрал вакцинардал дефицит диркIссания, ягу багьлух буллай бивкIссания, му чIумал бюхъайва вакцина буван хIукму бувминнал кьюкьрая гассят дасттарду хъанангу. Диванналия, тахлия гьаз хьуну, вакциналул хъирив гьан кIанай, тамансса бур аваза бутлай. На ттулва нину-ппу, кулпат, арс ва душ ттущала буцав прививкартту дуван. На вайннангу бувчIин бував хIакьину прививка дуваврияр вихшала дишин буллалисса цамур ххуллу бакъашиву.
