ЦУР-данул сияхIрайн бувну, Дагъусттаннай гьантлия гьантлийн гьарза хъанай бур коронавирусрал инфекциялийн къаршисса вакциналийн вихшала дуллалими.
ХIакьину медициналул идарарттайн хъунмурчIин вакцина къабувсса инсантал багьлай бушиву аьлтта чIалай, агьали цивппа мукIру хъанай бур прививка заралссар тIутIисса хаварду щялусса бушиврийн, ва лавмартсса азардануя буруччинсса чаран так вакцина бавриву бушиврийн.
НигьачIисса вирусрал ххяппухьхьун биривсса инсантал щихчIав вичIи къадирхьуну буллай бур вакцина ягу ялугьлай бур прививка дан бучIисса чIун дучIаннин, яни антителарду хьхьара хьуннин.
МахIачкъала шагьрулул 1-мур азарханалул хъунама хIакиннал жяматращалсса ва СМИ-лущалсса дахIавуртталсса буллалисса кумагчину зузи­сса Дагъусттаннал машгьурсса журналист Исрапил Исрапилов пандемия дайдирхьуния шинай ми иширттал дянив ушиврийн бувну, ванан цала яруннин ккаклай бия инсантал лавмартсса азардануща ххассал бан цуксса захIмат хъанай бивкIссарив хIакинтуран, бивкIулул ххяппула мурахас хьумигу цуксса хIаллай цайнма цивппа бучIан къахъанай буссарив.
Вай гьантрай Исрапил Исрапиловлул бунни вакциналул цалчинсса ххалаххи, бара тIий ур цайминнахьгу.
«Ччянива ччай уссияв вакцина бан, амма ттул чурххавусса антителарду лахъсса бушиврийн бувну, хIакинтурал маслихIат бувна махъун бутан. ХIакьину багьлай бур цайминнан эбрат ккаккан дан, цанчирча чIявуминнал на ккалли уллай ура коронавирусрал иширттал инсайдернан», – тIий ур Исрапил Исрапилов.
Журналистнал тIимунийн бувну, вакцина бувсса инсантал хъинну нажагь бакъа багьлай бакъасса бур азарханардайн.
Вакцина бан журналист гьуз учин увну ур Дагъусттаннай хIакьинусса кьини коронавирусрал инфекция чIявусса жагьилсса инсантурайнгу диллай душиврул ва цайнна къадиянтIишиврийн дакI дарцIуну акъашиврул.
«Лавмартсса азардануя мюхчан хьунсса чаран так вакцина бушиврия буслайнма бур пишакартал. Нагу вичIи дихьлай ура вихшала дан лайкьсса пишакартурах», – увкунни Исрапиловлул.