Дарманну бур анжагъ вакцина

Аьрасатнавугу, Дагъусттаннайгу (щалла дунияллийгу) ковидрал инфекциялул рахIму бакъасса щатIи, цIуницIакул хъапа бивщуну, хъиннува гьалакну ппив хьуну най бур. Жула дянивату му бала-хатIасса азарданул ттинин зевххунни язи-язисса инсантал, ливккунни апатI цимивагу къушлийн, тухумирттайн, жяматирттайн.
Ццах увкуну, бакIрай ба­цIаншиврул цукунссар жунна ялагу барашиннарду, хIу­ччарду, аргументру аьркин багьлагьи­сса!
Жула дянив къачансса агьлу ттигу бур вакцинация къадуллай бавцIусса, медициналул специалистурал тIимургу чулухух бивхьуну, ваца оьван кунма ппив буллалисса щялусса хавардугу ххалуйх лахлай, щябивкIун. Яртал, чялишну вакцина буллалисса щалла дуниялния авлия хьуну дакъахьунссар?!
Жу цал уттигу лабизлай бу­ру «Илчилул» буккултрайн, лакрайн, цинявппагу дагъус­ттанлувтурайн, зувагу, зула-зула язимигу, лагма-ялттумигу бурувччуну личIаншиврул, ччясса чIумул мутталий бувара вакцина, бувара уквасса ххалаххи!

«Илчилул» редакция

Расим РахIимов, Каспийскаллал шагьрулул азарханалул хъунама хIакин:
– Щалагу билаятрай кунна, Дагъусттаннайгу оьлуркъусса тагьар хIасул хьуну дур, COVID-19 азар ппив шаврицIун дархIусса. ЦIанасса ппурттуву, коронавирусрал инфекция лархъун, азарханардайн багьсса къашайшалт ххассал бан хъинну захIматну бур. ЧIявусса инсантал литIлай бур. НигьачIаву дусса иш хъанай бур, коронавирусрал азар дирсса лишанну хIисав хьуннин, азар диршиву кIул бан хъанай бакъашиву. Мунийну къашайшала, реанимациярттахун агьаннин, хъин уван­сса лахIзагу кутIа хъанай бур.
Вай укунсса ишру итталух бук­лай, инсантурайх дуклакисса якьамасса кьинирду чIалай, агьалинахь маслихIатрай тIий ура: вакцинартту баврийну бакъа жува ва азардануща ххассал хьунтIий бакъару!
Нагу, ттул каялувшиндаралусса цинявппагу хIакинтурал республикалий цалчин коронавирусрая буруччаву мурадрайсса вакцинартту буллай байбивхьусса ппурттуву дурссар прививкартту. Коронавирус лахъаврия нигьачIаву дакъасса, рахIатсса оьрму бучIантIиссар так чIявуминнал прививкартту дурну махъ. Инсантурангу бувчIин аьркинссар цIуллушиву дуруччаврил масъала жула кIунттихь бушиву.

Равзанат Маллаева, социал идаралул зузала:
– На бувсмунийн вих шайсса ва вихшала дишайсса инсан ба­къара. Прививка дуваннин профе­ссионалтал ци тIий бурив б­уккав, хъинну хъирив лавну. Яла, тинмай бавцIуну, ялугьлай бивкIра, ттула мачча-гъанцириннаву зат бувчIусса, итххявхсса инсантурал дувайрив-къадувайрив. ТIайламур бусан, дуван аьркинссар тIутIими ва дурми чIявуя. Чан-кьанну бакI цIий бивкIру прививка дурсса гьантрай, температура лахъ хьуну бивкIру тIий бия. БакI цIурча, хъин хьунссар, температура гьаз хьурча, яларай дагьанссар. БивчIантIий бакъарахха. Коронавирусрал ххутIахьхьун бириярчаннив, щин кIулссар? Ттул ссурахъил къуртал бувссар Санкт-Петербургливсса химико-фармацевтиялул институт (ЛХФИ). Ва жул щалвагу тухумрал хIакинни. ИчIува щил аьнч учирчагу, оьвчайсса ванайнни. Ваналгу мукIру бунна прививка дуваврийну ттулассагу, ттула лагма-ялттуминналссагу оьрмурду хха­ссал бувансса чаран бушиврий. Таш-вишну, кIихIуллану буминнахьгу маслихIатрай бура, бу­ккияра хIакинтал-аьлимтал прививкалул хIакъираву ци тIий бурив. Оьванмасса варсагъирттах вичIи мадихьларду. Медициналул элмулуха зузиминнал тIутIимур чIумуй лаласияра.

Аида Аьбдуллаева, Медициналул колледжрал 3-мур курсирал студентка:
– Дуккаврил шин дайдишин хьхьичI вакцина бан аьркиншиврий мукIруми ва ссаву ци бурив бувчIуми жагьилтуравух чIявуми медициналул идарар­ттай ккалаккими бунуккива. Цанчирча, хьхьичIмур шинал волонтерталну шагьрурдал ва районнал азарханардай зий бивкIсса жу «лажин лажиндарайн» данди бавцIуну тIий оьсса ва щийкIуй рахIму къабуллалисса коронавирусрал азарданийн. Инсаннал цIуллу-сагъшивруцIун, чурххал базу-базурду ххал бигьаврицIун бавхIусса пиша язи бувгьунугу, ттун ттунма къаххива бивкIу вакссава жула чIарахва бушиву, ла­хьхьу сагъ-саламатну ивкIсса инсан, хIакьину ссихI биял къахъанай, бугъ хъанай уну, ттущавагу, ттуярва за кIулсса хIакинтуращагу цичIав бан къабюхълахъисса иширттавунгу студентну бунува багьаншиву.
ХIасил, коронавирусрал на къашавай хьура гъидайдихьулийва, ттущал архIал, хьхьичI-махъ, къашавай хьунни кулпатравусса цинявгу. Аьркинссаксса антителарду бунугу, вакцинарив на бав дарсру дайдишин хьхьичI, цанчирча ла­хъай азардал яла аргъ дизантIимур чIун ссут-кIи духьувкун. Азарданул хIалгу кIулну, навагу, ттула лагма-ялттумигу мюхчанну, бурувччуну ччай бур.

Ирина М.А.:
– ЦIубутIуй на къадурссия прививка, вихшала дакъа. Муния нигьа бусансса хаварду чIявусса ппив хьуну бия соцсетирдаву. Ттула душнил дунни. Ттухьгу дува тIий бур. ЦIана на, ттула цIуллу-сагъшиврул тагьардануцIун бавхIуну, дарур­тту канай бура. Хъин шайхту, чара бакъа вакцинация дансса пикри бур. Ялун бивсса ковидрал щатIив хьхьичIминнуяр нигьачIаву ду­сса бур. Ттун кIулсса чIявусса инсантал кьатI бунни ва азаруннил. Гьай-гьай, ттувунгу нигь дагьунни. Вакцинация аьркиншиву бувчIлан бивкIунни.

Гьажар Буттаева, учительница:
– На нава рязину дав прививка. Цалчин, ттун кIулсса чIявусса, къашай хьуну, захIматсса тагьарданий бия. Ттун мукунсса тагьарданийн навагу багьну ччай бакъая. КIилчингу, ттущал яхъанай дур дугьарасса нину. Нава къашавай хьуну, ванийнгу азар лахъарча, ва хха­ссал дан къахьунссар тIисса ццах бур ттуву. Шамилчингу, на бура школалий зий, чIявусса оьрчIащал, учительтуращал хIала-гьурттуну. Шардайнгу ттучIан ччя-ччяни ду­ххай дугьарасса чIаххувщар. Нава къашай хьурча, чIявусса инсантурайн ттуяра азар лахъанссар, нава сававну цаманан цичIав хьурча, ци бави тIийгу бикIара. ТIайламур бусан, ттуятуванияр ттула лагма-ялттунал пикрилий бикIара.