Октябрьданул 18-нний Дагъусттаннал БакIчи Сергей Меликовлул каялувшиврий хьунни КОВИД-райн къарши­сса ярглий дакъасса батIаву. Ваний ххал бивгьунни КОВИД-19 азарданул хьхьичIалу кьукьинсса ялун ххи бувсса чаранну.

Шикку махъ лахълай, Сергей Меликовлул бувсунни, цаймигу регионнай кунма, республикалийн бивну бушиву пандемиялул цIусса щатIи, цIунилгу гьарза хъанай бушиву КОВИД-рал къашавайсса ва ливтIусса инсантал.
Республикалул каялувчинал тIимунийну, агарда укунсса тагьар личIарча, гьарза хьунтIий бур кислородрал тIалавшин ду­сса къашайшалт. ЦIана укунминнал аьдад дур 670.
Дагъусттаннал БакIчинал цIунилгу тIалав бунни вакциналул ххалаххив буллан. «Вакцинациялул ва тестированиялул план бартдигьлай бакъар, миннунсса цинярда шартIру дузал дурну дуна», – кунни Сергей Меликовлул.
Тагьардания ххину бувсунни республикалул Роспотребнадзорданул каялувчи Николай Павловлул. Ванал тIимунийну, хIакьину региондалий сияхIрайн лавсун ур КОВИД-рал къашавай хьусса 54 азара инсан. ЦIуну инсантал къашавай хьуну бакъа­сса бур так 3 муниципалитетрай – БежтIиял участокрай, Лакрал ва ЦIунтIиннал районнай. Къашавай хьуминнавату чIявуми бу­сса бур 30-59 шиннавусса. Гьарза хьуну бур 60 шинавату ливчуми къашайшалтгу. ЧIявусса бур базардавун, рестораннавун, машлул центрдавун заназиминнаву къашавай хьумигу. Вай идарарттал заллухъруннащалгу даву дачин дуван аьркинну бур.
Николай Павловлул бусаврийну, аьркинни кьянкьану ялув бацIан маскарду дахIаврил, административ къатравун, ттучаннавун, школарттавун, вузирдавун буххайсса кIанттурдай фильтрду даврил, дезинфекцияртту дуллалаврил низамрал. Багьлай бур 65 шин хьусса зузалт манзилданий зий битан.
Сергей Меликовлул тапшур бунни гужлан дуван информациялул ва бувчIин баврил давуртту.
Оперштабрал батIаврий махъ лавхъунни ДР-лул цIуллушиву дуруччаврил министр Татьяна Беляевалгу. Ванил бувсунни КОВИД-рал къашайшалт цукун хъин буллай буссарив азарханардай, кислородрал концентраторду циксса дуссарив, дарурттал дузалшиву цукун дуссарив.