Октябрь зурул 21-нний, Дагъусттаннал Миллатирттал политикалул ва динийсса иширттал министерствалий дипломру буллунни миллатирттал дянив дусшиву ядаврил тема дюрхъуну аьч даврил республикалул конкурсрай ххув хьуминнан.

Ххув хьуми барчагу бувну, бахшишругу дуллунни министр Энрик Муслимовлул. Ванал кIицI лавгунни конкурсрайн чIярусса макьаларду дуркIшиву, жюрилул яла лайкьми язи дургьушиву. «Циняв призертал лавайсса кьиматран лайкьссар. Миллатирттал къайгъурдалсса буллалисса министерствалущал архIал, зугу жула агьалинан, республикалун чара бакъа аьркинсса давриха зузиссару. ДакIнийхтунусса барчаллагь зул захIматран», – увкунни ванал.
Ва конкурсрай кIилчинмур кIану бувгьунни «Илчилул» отделданул редактор ПатIимат Рамазановал. Жюрилул лахъсса кьимат бивщунни дагъусттаннал ва оьруснал агьалинал дусшиврул арарду куртIгу, цIакьгу дуллалисса ПатIиматлул «Дусшиврун миллатру ва динну личIи дакъассар» тIисса макьалалун. Бусан ливчIунни сайки гьар шинах дувайсса конкурс душивугу, ванил мурадгу миллатирттал ва диннал хIала-гьурттушиврул, дусшиврул арардал темалух масс-медиалул къулагъас дуван буваву душиву.