Законну кIулминнал конкурс

Октябрь зурул 12-нний МахIачкъалалив, «Россия – моя история» тIисса тарихрал паркраву, хьунни рувхIанийсса кIулшивуртту лахьхьин дуллалисса идарарттай дуклакиминнал дянив терроризмалийн къаршисса законну цуманан ххуйну кIул дурив ххал дуллалисса республикалул конкурсрал хIасиллу дуллалисса финал.

Конкурсрай гьуртту хъанахъиминнан тIайлабацIу чIа тIисса ихтилат бувна национал политикалул ва динийсса иширттал министрнал хъиривчу Мурад Шяпиевлул. Финалданий гьуртту хьуминнан терроризмалийн къаршисса Аьрасатнал законнал хIакъиравусса ттуршва суалданухьхьун жавабру дулун багьлай бия. Конкурсрал комиссиялул кIицI лавгунни жагьилтуран ххуйну кIулну душиву терроризмалуцIун дархIусса законну. Цалчинмур кIану бувгьунни Рамазан Дадаевлул (Дагъус­ттаннал исламрал университет, ш. МахIачкъала), кIилчинмур – Сайпуллагь-кьади МахIаммадовлул (Щайх МухIаммад-Ариплул цIанийсса мадраса, ш. МахIачкъала) ва МахIаммад МахIаммадовлул (Щайх АьбдурахIман-хIажи Ассабскийл цIанийсса мадраса (ш. Ассаб, Шамильский район). Шамилчинмур кIану УнцIукIуллал ва Ххунзахъиял районнайсса мадрасалул мюталимтурайх ва Хасавюртливсса исламрал институтрал студентнайх бавчIунни. Национал политикалул ва динийсса иширттал министр Энрик Муслимовлул, циняв финалистътал барчагу бувну, ххув хьуминнан дипломру ва арцуйну­сса премияртту дуллунни.