Аьрххи-ххуллурдайсса асарду

Гьарца кьини къачансса чIун лагай жулла ххуллийх, кIюрххил даврийн, ахттакьунмай махъунмай шаппайн най, ягу жулва иширттай чун-бунугу най. Ххуллийхсса чIумал дулланмур сайки къадикIай, так лагма-ялттусса тIабиаьтрай тамаша булларча, шагьрулул кIичIирттавусса инсантурал зана-кьулушиндарал хIисав ласларча бакъа. Укунсса чIумал хIасул хьусса асарду бучIину чIалан бикIай кув чIумал чагъарданийн ласунгу. Ай, балики, укунсса кIанттурдай жувагу жухва жува личIлулну буругаван, жунма жува цал ххишала бувчIин, чIалан.

Чан хьуну бур маршруткартту

Жулла шяраваллаву инсантал чан шаврицIун чан хьуну бур МахIачкъалалия Лаккуйн­сса маршруткардугу. ЧIумуй шаппату бувккун, автостанциялийн кIюрххил цила чIумал къабиярча, муния тинмай Ла­ккуйнсса маршрутка бакъар, му буцIинуксса инсантал салкьи къахъанай тIий.
КIюрххилсса маршруткардайн чIал хьуминнах ялугьлай буссар 6 инсаннансса кIану бу­сса «Ларгус». Ца кьини, маршруткарду бакъа, мукунсса «Ларгусрай» лавгра нагу Лаккуйн. КIюрххила «бакI хъин був­сса» ца ххуллулссаннал Лаккуйн бияннин махъсса 5-гу пассажирнал ва шупирнал бакIру «пурш» лахъан бувуна, билаят­рал цIанасса хъуниминнал даву дащуй дихьлай. Гъумукун ивну махъгу шупирнащалгу бяст буллай айивхьуна, цал таксилул багьа (500 къ.) буллай ура, мунияту цува Гъумучату цала N шяравунгу иян уван аьркинссара, акъарив му цири хъанахъисса – маршруткалул куна, шагьрулул автостанциялия Гъумукун иян уллалисса, мукун буния махъ цал багьагу маршруткалух кунмасса булунна тIий…

НигьачIийсса гьайдагизру

Зунттал дуланттайх ссур хьуну цаннил хъирив ца нанисса машинартту кув лахьлан бикIай, лихъулий буклай, куннал хъирив кув багьну нанисса оьрчIаха, кувгу кIинттул, марххалттанийн ягу микIирайн дахьра щилай-къащилай, ссур хьуну нани­сса чанардаха – цалла ягу цаманал цIуллу-сагъшиврун, оьрмулун зарал шаврия нигь-ццахгу дакъа, тормоз дурагу къазузи­сса кунма.

Мадару ххуллул яхъула хъанакI

Ккурттаннал (Губденнал) дуланттая ливчуну, Лаващиял чулийнмай нанисса ххуллуцIух бур чIявусса хъанакIул къатIри. Инттухунмай, ми тIутIайх бивчуни, кIа даралул ляличIиссара сий дикIай. Ссуттиллив ми къатIрая хъанакI датIлатIисса ххуллул­сса чан къашай. Мукунминнал пикри къабайхьунссар машинарттал трассалул чIарав ххярхмур датIлан, бюхъавай, къабучIишиврул. Гьантлун му ххуллийх лавай-ялавай заназицирив машинарттал выхлопной газрал хъунмасса зарал биян буллалиссар уртту-щинан. ХхуллуцIух ххярхмур, ци духьурчагу, уздансса къадикIайссар. Ва кIану хъамамабитаванни.

ХIалбалул хъачIру

Ккурттаннал дуланттугу диртун, кьабивщусса кIанттайх нанисса чIумал, ххуллул урчIа чулухсса хъачIру жулла респуб­ликалийн бувкIсса туристътал лащан дуллан бикIай хIалбалул къатрурдаха, кув кIанттурдай цIансса, кув кIанттурдай чанна­сса ххярагьалтту дусса.

Лархьхьу тура

Ххуллурдай итталун дагьлай дуссар «Ради Аллагьа не кидайте мусор» тIисса журалул чичрурду. Аллагьнал цIа зумувну чирчу­сса калималулгума кумаг къабуллалир цаппарассава инсантуран цалла дуркумунил, ишла дурмунил ххиличIрурду дунийра ххуллийн палцI дуллалисса лар­хьхьу тура кьаритан. ТакIуйвагу къакIулхьунссар, шагьрулул бикIу, зунттал бикIу, ххуллурдайн цIинцI экьидичлачисса инсантурал бакIраву му ппурттуву ци пикрирду бикIайссарив.
Уттигъанну Абхазнавун лавгун буна ххуллийх заназиминнахь (бахьтта бикIу, машинарттай бикIу) ххуллурдайсса марцIшиву дуруччаврихлу ххуллул идаралул чулухасса барчаллагь тIисса чичрурду итталун дагьунни.