ЦIусса хаварду ца-кIива ххуттайну

АьсатIиннал мазрайсса киносурат «Оскарданун» ккаккан дунни
АьсатIиннал мазрайсса «Разжимая кулаки» тIисса киносурат Аьрасатнал ккаккан дурну дур «Оскар» кинопремиялун. Режи­ссер Павел Чухрайл ( ва Аьрасатнавусса Оскарданул комитетрал каялувчири) бувсмунийн бувну, фильм АьсатIиннаву ларсъсса дур, чIяруми рольлугу дугьлай бур, къаактёрталча, кIанттул агьлу. Мизур тIисса шагьрулий хъанахъисса иширттаятусса дур цурда киносуратгу. Ппу арсру кьянкьану, тIалавшиннардай тарбия буллай ур, душрив ччавулий хъихъи лавсун. Буттал муданнасса аякьалия шацI хьусса душнин шагьрулия лихъансса пикри багьлай бур. Киносуратрал режиссер бур Александр Сокуровлул ученица Кира Коваленко.

Мукьра шинавусса оьрчIал полиция бучIан бувну бур

ЦIусса Зеландиянаву мукьра шинавусса оьрчIал полициянайн оьвкуну, шаппай бучIан бувну бур цала игрушкартту миннан ккаккан дуваншиврул. ОьрчIал полициянайн оьвкуну, цала мурад бусайхту, диспетчернал баян бувну бур, анаварсса иширттай бакъа полиция бучIан буван къабучIинугу, мукьра шинавусса оьрчI ялугьлай ушиву. Курт тIисса полицейский увкIун ур оьрчIачIан. Ванал нину къашавай ляркъуну дур, ппу тIурча, чIивима оьрчIалсса буллай. Цува учIаврия ххари хьусса оьрчI хъиннува шад уван полициянал машиналийсса мигалкагу лархъун дур.

Дучрал тIуллу лахьхьин – вахIшийсса жазиралийн

Дучрал тIуллу лахьхьин Къалмухънал дазуйсса жазиралийн ( Маныч-Гудило тIисса озеролийсса) лавгун ур блогер ва путешественник Миша Ронкаинен. Тикку ряхцIалунниха ливчусса шиннардий яхъанай бур тархъансса мустангру хьу­сса ичIаллил дучри. Тай дучрал вахIшийсса тIуллу лахьхьиншиврул блогер жазиралийн лавгун ур Къалмухънал авлахърайх чай бурттий. Щингу дакъасса, связьгу дакъасса авлахърайх.

МакьараоьрватIив – сиам кIинничалт

Американаву Массачусетс штатрай кIира бакI дусса макьараоьрватIив – сиам кIинничалт бувну бур. Вайннул цIуллушиврул ялув бавцIусса пишакартал бур, рентгенгу дуварду, гьарца оьрватIул цалла цIумугу дур,оьрмулун цукунчIавсса нигьачIиннагу дакъар, паракьатну занайгу, гьузуйгу бур тIий.

Щинавусса ресторан

Таиландиянаву машгьур хъанай бур щинаву щябивкIун дукра канакисса ресторан. Чао Прайя тIисса нех ялтту лаглай, къатри щинавун дюкьан дуллай дунавхьур, бизнес дацIан къаритансса чаран лявкъуну бур Нонтхабури тIисса шагьрулийсса кафелул заллу Титипорн Джутиманоннул. Ччанну щинаву бивхьуну, паракьатну бигьалаглай бур ванил ресторандалувун бучIайми.

1