Ларгсса нюжмардий Волгоградрай хьусса Щалагу Аьрасатнал санитар авиациялул форумрай баян бунни «Золотой час» тIисса Щалагу Аьрасатнал премиялун лайкь хьусса хIакинтурал цIарду.
ДР-лул Минздраврал пресс-службалий бувсунни ххув хьуминнал сияхIрай бушиву Дагъусттаннал санавиациялул хIакинталгу.
Щалагу Аьрасатнава яла чIявусса гьуртту хьусса «Врач года в санитарной авиации» номинациялий ххув хьуну ур Дагъусттаннал катастрофарттал медициналул центрданий борт-хирургну зузисса жула лакку оьрчI, ШавкIуллал шяраватусса Давид Учуев.

Пандемиялул цалчинмур щатIи ягинсса ппурттуву захI­матсса ва архсса зунттал рай­он­найн жапасса тагьарданий ме­дициналул вертолетрай ванал дур­сса леххавурттал аьдад хьуну дусса дур щала Аьрасатнаву рекорд дишинсса.
– Чан бакъая вертолётрал бортрай къашайшалал тагьар захIмат хьусса ишру, ттунмалу тIайласса хIукму кьамул бувну, инсантал ххассал бан багьсса, – тIий ур Давид.
Давидлуя жу бувсъссия республикалий коронавирусрал инфекциялул цапчинмур щатIи яла къизгъинсса ппурттуву. Лавмартсса вирусращал талатиминнал хьхьичIкьюкьлуву вагу ия. КIивахъул барзру хьуну бия ванал, кулпатрал аьлтту уккан чари, шанул ккик лахъанссавагума мажал бакъа. Ттун хъинну асар хьуна ца интервьюраву ванал зумату дурксса калима: «Пандемия дух дайхту уччиннин шану лахъанна!» – тIисса.
Пандемия дух дан хъанай ттигу дакъар. Уччиннин шану лахъансса каши ДавидлучIа утти­нингу хьусса ххай бакъара.
«Нештатная ситуация в полёте» номинациялий ххув хьуну ур Дагъусттаннал катастрофарттал медициналул центрданул оьрчIал борт-анестезиолог-реаниматолог Илияс Шарбузов. Ваналмур давривугу чIявур хар-хавар бакъа захIмат хьусса вилттили оьрчIру ххассал був­сса ишру. Масалдаран, барз биял къавхьуну цIуну бувсса оьрчI вертолетрай лавсун нани­сса ппурттуву, гьутрурдал диялдакъашиву сававну, ссихI биял къахъанай бивчIавай ливчIсса кIанттава ххассал бувну бур.
Санитар авиациялул пишакартурал захIматран кьимат бищун ккаккан дурсса премия «Золотой час» дуллай бур 2019 шиная шиннай. Гьашину ва премия дуллуну дур шамилчин. «Золотой час» тIисса калима медициналуву ишла дуллай бур нигьачIисса цIунцIия хьусса ягу азар оьдиркIсса ишираву инсан бивкIулуща ххассал ансса чIивисса лахIза кка­ккан бан. Гьамин, санитар авиациялухь дур «мусил ссят» ишла дурну азарвахъул оьрмурду хха­ссал бансса каши, ххуллул транспортран захIматшиву ду­сса кIанттурдай тIурча, му дакъа чара бакъар.
КIицI къабувну къабучIир, гьашинусса шинал Дагъусттаннай санитар авиация 120-лла лерххун дур республикалул архсса районнайсса захIматсса къашайшалтрачIан.