Утти агьалинаща цивппа бувкIсса кIанттурдай сияхIрай бацIан хьунтIиссар, МВД-лул хасъсса подразделениялийн къабувкIна, «Госуслуги» порталданий. Интернетрайхчил сияхIрай бацIайсса куклушинна дунни агьалинан Аьрасатнал Виваллил иширттал ва Цифрардал лябуккулул министерстварттал.

Агьалинаща цала масъала щаллу бан бюхъантIиссар элект­рон журалий. Аьрза чичиншиврул «Госуслуги» порталданий авцIуну икIан аьркинссар.
Му бакъассагу, инсанначIа дикIан аьркинссар Цасса па­ччахIлугърал реестрданий (недвижимостьрал) ккаккан дурсса ихтияр. СияхIрай ацIаврил свидетельство дучIайссар «Госуслуги» порталданийн личный кабинетрайн электрон журалий, электрон къулбасращал.
Ванил гава чагъарданийсса МВД-лул пишакарнал къулбас дурну цIакь бувсса свидетельствалул кIану бугьлагьиссар. Инсаннаща, электрон журалийсса свидетельствалул распечатка дурну, аьркин багьлагьисса кIанттурдай ккаккан бан бюхъайссар.
Укунсса куклушинна Аьрасатнал цинярдагу регионнай ду­ссар. Миграциялул масъаларттаха зий буссар 2,5 азарунния ливчу­сса подразделенияртту.
Ялу-ялун ва журалий дуллалисса куклушиннарду агьалинан хъиннура рахIатну хьунсса, вайннуха зузисса органнал зузалтрал давугу бигьа дансса чаран ляхълантIиссар. Аьрасатнал МВД-лул экспертътурал бусласимунийн бувну, кIицI лавгсса масъалартту электрон журалий щаллу буллан бивкIун махъ, чIаланну чан хьуну бур ведомствалул подразделениярттайн букIлакIими.
Ва бакъассагу, 2022 шинал июль зурул цанния байбивхьуну, укуннасса дахханашивуртту дантIиссар балугъравун къабивми (14 шин къархьуми) цивппа яхъа­нахъисса кIанттурдай сияхIрай бишавривугу.

Амина Юсупова