Октябрьданул 12-нний «Дагестан» РИА-лий хьунни «Открытая власть» тIисса проектрал лагрулийсса пресс-конференция. Журналистътуращалсса хьунабакьаврийн увкIун ия ДГУ-лул ректор Муртазяли Рабаданов. Ванал мурадгу бия, ва шинал республикалул яла хъунмур вузран 90 шин хъанай, цала хьхьичIуннайшивурттая ва захIматшивурттая, хIакьинусса масъаларттая ва ми щаллу баврия гьарта-гьарзану бусансса.

Вузрал хIакьинусса къай­гъурдая буслан хьхьичI Муртазяли Рабадановлул дакIнийн бувтуна ДГУ-лул тарих-таварихгу.
«ХIакьину республикалий цурда-ца ара дакъахьунссар ДГУ-лул хIадур увсса пишакар къазузисса. Ччарча элмулул, ччарча культуралул, ччарчагу кIулшивуртту дулаврил аралуву зузисса пишакартурал 80% бур ДГУ-луву личIи-личIисса шиннардий дуклай бивкIсса студентътал. Вай шиннардил му­тталий Дагъусттаннал яла хъунмур вузрал хIадур увну ур 120 азараксса пишакар», – бувсунни ректорнал.
ДГУ-лул гьану бивзун бур 1931 шинал октябрьданул 8-нний ДАССР-данул Совнаркомрал хIукмулийну Агро-педагогикалул университет тIитIаврищал. Хъиривмур шинал, Дагъусттаннай Шяраваллил хозяйствалул ва Медициналул институтру тIивтIукун, Агро-педагогикалул университетрая бувну бур Да­гъусттаннал паччахIлугърал педагогикалул институт. Шивун цалчинмур шинал кьамул увну ур 75 студент. ДГУ вания бувну бур 1957 шинал.
Муртазяли Рабадановлул бусаврийну, хIакьинусса кьини вузрал 18 факультетрай дуклай усса ур 15933 студент. ДГУ-лул 4 филиал бур тIивтIуну республикалул 4 шагьрулий.
Вузрал хьхьичI бавцIусса масъаларттая буслай, ректорнал кIицI лавгуна ДГУ-луву биялну бакъашиву жагьилсса аьлимтал. Вузрал пишакартуравух хъинну чанну бусса бур 40 шин хьун дурасса жагьилсса пишакартал. Ва шинал хьусса дахханашивурттая буслай, кIицI бувна гьашину ДГУ-лул циняв факультетирттай ххи бувшиву бюджетрал кIанттурду ва гьашину магистратуралувун бувхминнал сияхI хъунна хьушиву. Ректорнал мукъурттийн бувну, ва ишгу вузрал ца хьхьичIуннайшиврун ккалли бан бучIиссар.
Муртазяли Рабадановлул бусаврийну, ва шинал ДГУ-лувун дуклан бувхсса студентътурал дяниву бусравну бивкIун бур информатикалул ва технологиярттацIун бавхIусса факультет, мукунма аьдатравун багьсса юриспруденциялул, экономикалул, менеджментрал, чил мазурдил факультетру. Мукунма гьашину бусравну бивкIун бур филологиялул факультетгу. ХьхьичIми шиннардих бурувгун, ххуйсса конкурс хьуну дур гьашину оьрус мазрал ва дагъус­ттаннал мазурдил отделениялийгу. Сайки циняв миллатирттал мазурдил отделениярттал цалчинми курсирдайн бувкIун бур кьамул бан ккаккан бувссаксса студентътал.
Студентътал чансса, хьхьарасса кIулшивурттащал бувкI­миннувух бур географиялул, физикалул, математикалул элмурдацIун бавхIуми факультетру.
Пресс-конференциялул ахирданий Муртазяли Рабадановлул, журналистътурал суаллахьхьун жавабругу дуллуну, кIицI бувна 90 шинал юбилейрал лагрулий вузраву хьунтIишиву личIи-личIисса батIавуртту, конференцияртту, семинарду ва хьунабакьавуртту.