Вай гьантрай даврил иширай Ярославуллал областьрайн лавгсса Дагъусттаннал культуралул министр Зарема Буттаевал тIутIив дирхьунни Ярославль шагьрулул дязаннивсса Совет Союзрал кIийла Виричу АхIмад-Хан Султаннул гьайкалдануцI. Ва иширая ванил цила бувсунни социал сетирдай.
— Культуралул ирс ябуллалисса Дагъусттаннал Агентствалул каялувчи МахIач Мусаевлущал, Ярославуллал областьрайсса Дагъусттаннал вакил Асланбаг Далгатовлущал ва областьрал Культуралул департаментрал директор Марина Васильеващал, Заволжский райондалул администрациялул БакIчи Андрей Мамонтовлущал Совет Союзрал кIийла Виричу АхIмад-Хан Султаннул гьайкалдануцI тIутIив дишарду. АхIмад-Хан Султан щаллагу дунияллий машгьурсса аьрали лётчикри-асри, СССР-данул лайкь хьусса летчик-испытательли, Франциянал Бусравсса лётчикри. Ва Ярославль, Мелитополь, Алупка шагьрурдал Бусравсса гражданингур. Буттал кIанттул цIанийсса дяъвилул шиннардий билаятрал яла хьхьичIунми летчиктурал-астурал ацIуннал кьюкьлуву ивкIсса АхIмад-Хан Султан дяъви къуртал хьувкун авиациялул ва космосрал техникалул испытательну ивкIссар. Багьавайри ванайн XX аьсрулул цIанихсса личность учайссагу. Виричувнан хасну чIирайн лархъсса улттуй Парижливсса аэропортрай «Летчик от Бога» тIисса махъру буссар, -укун чичлай бур Зарема Буттаева.
Буниялттунгу, АхIмад-Хан Султан кунмами Заннала лётчиктал хьун ляхъан бувмири. Дагъусттаннал ва Къиримнал хъунасса арснал гьайкалданучIан бивсса Зарема Буттаевайн барчаллагьрай, шиккува дакIнийн бутан ччива АхIмад-Хан Султаннул ссукIуврай мунал гьалмахчунал, Совет Союзрал Виричу Владимир Ильюшиннул, «АхIмад-Хан Султан кIийла Виричу акъар, мукьийла Виричури. Лайкь бувнува къабуллуссар мунан кIива Мусил цIуку», — увкуну бивкIшивугу.
Бусанну ва октябрь барз Виричу дунияллийн увксса барз бушиву: увссар октябрь зурул 25-нний 1920 шинал Къиримнаву, Алупка шагьрулий.
