Эшкьи хьуну лавгунни Дагъусттаннах

Октябрьданул 19-нний «Дагестан» РИА-лул конференц-залдануву хьунни Хабаровскаллал крайрайсса жула ватанлувтурал къайгъурдалсса буллан ивтсса Дагъусттан Республикалул ХIукуматрал вакил ва «Бизнес-Тур в Дагестан» тIисса проектрал сакиншинначи Байдуллагь Исяевлущалсса хьунабакьаву.

Ванащал архIал шиккун увкIун ия ДР-лул миллатирттал иширттал ва диндалул арардал министрнал хъиривчу Арсен МахIмудовгу. Хьунабакьаврил мурадгу бия уттигъанну жулла республикалийн хъамалу бувкIун бивкIсса Хабаровскаллал крайраясса туроператортурал асардая ва аьмну аьрххилул хIасиллая бусансса.
Арсен МахIмудовлул кIицI бунни Аьрасатнал регионнай цайва бивхьусса буржру би­ттур буллай бушиву ДР-лул ХIукуматрал сакин бувсса 30-нния ливчусса вакилханарду. Дагъусттаннайн Хабаровскаллал крайраясса хъамал бучIан ччай бур тIисса Байдуллагь Исяевлул сиптагу ДР-лул Миннацрал кьамул дурну дур рязину ва гьарца ишираву цащара бюхъайсса чIарахбацIаву дурну. ХIасил, жулла республикалийн бувкIун бур туроператорталгу, журналистъталгу хIала-ккаласса, 10 инсанная сакин хьусса, Хабаровскаллал аьрщараясса делегация. Арсен МахIмудовлул бусаврийну, хъамаллуран вайннал хIадур дурну дур Дарбантливсса, Сулакьрал къуманивунсса ва Ххунзахъиял райондалийнсса аьрххирдал гьарта-гьарзасса программа. Экскурсиярдая махъ хъамал кьамул бувну бур ДР-лул Миннацрал, ДР-лул Минтуризмалул ва ДР-лул Минпромторграл каялувчитуралгу, цачIа-цачIанма яхши-хаш бан оьвкуну.
«Жула хъамаллурах дурсса аякьалул, къулагъасрал ва ми кьамул баврил даражалул гьаз дуллалиссар Дагъусттаннал имидж, бусрав дуллалиссар жула миллатирттал культура, аьдат-эбадатру ва жула багьу-бизу. Жул министерствалул хъунмур мурадгу этнотуризм лядуккан давур, цанчирча Дагъусттаннайн цайми регионнаясса хъамал най буну тIий хаснува жула агьалинащал кIул хьун, жулла щархъурду ккаккан ва агьалинал хIакьинусса оьрмулущал, багьу-бизулущал кIул хьун», – увкунни А. МахIмудовлул.
Байдуллагь Исяевлул бусаврийну, Хабаровскаллал крайраясса хъамаллурал Дагъус­ттаннайнсса аьрххилиясса асарду хIакьинусса кьинигу социал сетирдаву дазу-зума дакъа ххарисса ва цIунилгу республикалийн бучIан хIадуршиврия тикрал буллалисса бур.
«Дагъусттаннайн укунсса журалул аьрххи сакин баврил мурад кIира региондалул агьали цаннащал ца кIул бансса, гъан бансса ва дусшиврул арардал гьану бизанссая бивкIсса. Хъамаллурал асардал хIисав-сан дуркун, бувчIунни жущара ва сипталул мурад бакIуйн буккан бан бювхъушиву. МахIаттал-хIайран хьуну бия тай жула агьалинал дакIру аьчухшиврий ва цивппа хъамалу баврий. ХIайранну бия хъамал жула базардавусса марцIсса ахъулссаннуя ва ахънилссаннуя, дикIул ва накIлил продукциялиягу. КIилий хIайран бувну бия жула миллатирттал дукрардалгу», – бувсунни Байдуллагь Исяевлул журналистътурахь.
Ванала бусаврийну, делегациялуву бивкIсса Хабаровскаллал крайрайсса сий дусса, туризмалул аралуву бусравсса ва махъ нанисса турфирмардал вакилтал бия тIар жулла республикалул туризмалул хъунма­сса потенциал бушиву чIалай бур тIий.
ЦIана хасъсса къуллугъру зий бусса бур «Хабаровск – Махачкала, Махачкала – Хабаровск» тIисса чартерданул рейсру тIитIаврил хIакъиравугу. Байдуллагь Исяевлул шикку кIицI бунни укун­сса рейсру щурущи даврищал Да­гъусттаннаясса туристътурангу хъинну дакI дакьинтIишиву Хабаровскаллал аьрщарай – ти­кку бусса бур авлий буккан, балугъру бугьлан ххуйсса шартIру дузал дурсса, караматсса тIабиаьтрал кIанттурду. Аьра­сатнал Архмур Востокрайсса тIабиаьтра дусса дур Тихий океандалулгу биялалусса ва туристътуравун гьавас бутайсса.